सामाजिक सञ्जाल फेसबुकका प्रमुख मार्क जुकरवर्गले बेलायती राष्ट्रिय पत्रिकाहरूको हालैको अङ्कमा पूर्ण पृष्ठको विज्ञापन छापी फेसबुकबाट व्यापक गोप्य तथ्याङ्क सार्वजनिक भएकोप्रति क्षमा याचना गरेका छन् । ‘फेसबुकमा आएको तपाईंको सूचनालाई संरक्षण गरी राख्ने जिम्मेवारी हामीलाई छ । यदि यो गर्न सक्दैनौं भने हामी योग्य हुन सक्दैनौं’, उनले भनेका छन् । ‘सन् २०१४ मा फेसबुकका लाखौं प्रयोगकर्ताको तथ्याङ्क चुहिएको’ विश्वविद्यालयका अनुसन्धाताले गरेको जाँचबुझबाट थाहा भएको जुकरबर्गले उक्त विज्ञापनमा स्वीकार गरेका छन् । उनले भने–‘यो घटना विश्वासप्रतिको धोखा हो र त्यस समयमा केही गर्न नसकेकोमा म क्षमा याचना गर्न चाहन्छु । हामीबाट यस किसिमको गल्ती पुनः हुने छैन भन्ने निश्चित गर्न आवश्यक कदम चालिसकिएको जानकारी गराउन चाहन्छु ।’ बेलायती राष्ट्रिय पत्रपत्रिकामा छापिएको उक्त बिषय यूरोप, अमेरिकालगायतका क्षेत्रमा फेसबुकबाट भएको कमजोरीका बारेमा अनुसन्धान थालिएपछि फेसबुकको सेयरमा आएको गिरावटसँगै जुकरवर्गद्वारा हालै सार्वजनिकरूपमा दिएका अभिव्यक्तिसँग मेल खाने खालका छन् । जुकरवर्गले भनेका छन्–‘अहिले फेसबुकले नियम परिवर्तन गरिसकेको छ,  त्यसैले अव यस्ता गल्ती भविष्यमा हुने छैनन् ।’