दर्शकको मन जित्दै गायिका सृजना गुरुङ

-- नेपाली टाईम्स अष्ट्रेलिया / प्रकाशित मिति : बिहिबार, जेष्ठ १७, २०७५

काठमाडौं– गायिका सृजना गुरुङको स्वरको एउटा नयाँ गीत तथा म्युजिक भिडियोले दर्शक तथा स्रोताको मन जितिरहेको छ । ‘किन दु:ख मान्छौ…’ शीर्षकको उक्त गीतको भिडियो यूट्युबमा अपलोड भएको छोटो समयमै दर्शकको मन जितेको हो । गीतमा गायक तथा संगीतकार बिपि वाग्लेको शब्द तथा संगीत सुन्न सकिन्छ । विष्णु अधिकारी उक्त गीतका संगीत संयोजक हुन् ।
युवराज वाइवाद्वारा निर्देशित उक्त भिडियोमा अभिनेत्री रीमा विश्वकर्मा तथा दीपक काफ्लेले अभिनय गरेका छन् । उत्सव दाहालद्वारा छायांकन गरिएको उक्त गीतको म्युजिक भिडियोलाई निशान घिमिरेले सम्पादन गरेका हुन् ।
स्टाइलिस गायिकाको रुपमा चिनिएकी सृजना गुरुङ पछिल्लो समय कन्सर्टमा समेत सक्रिय भैरहेकी छिन् । अघिल्लो वर्ष ‘मेरो एल्बम’ शीर्षकको डेब्यू एल्बम सार्वजनिक गरेकी सृजनाले यसअघि सार्वजनिक गरेको ‘खुशी छ यो मन…’ गीतको म्युजिक भिडियो पनि दर्शकमाझ लोकप्रिय भैसकेको छ । मेरो एल्बमका गीतहरुमार्फत सृजनाले पप गायन क्षेत्रमा आफ्नो छुट्टै पहिचान बनाउने प्रयास जारी राखेकी छिन् । ‘मेरो एल्बम’ मा किन दु:ख मान्छौ तथा खुशी छ यो मनसहित फरिया र गुन्यूचोली, न रुन समाय पाएँ, वैंस मेरो फूलेका, राजकुमार जिन्दगीको, तिम्रो कोमल आँखाको शीर्षकका गीतहरु समावेश छन् ।
यस्तो छ किन दु:ख मान्छौं गीतको म्युजिक भिडियो