काठमाडौं– प्रधानमन्त्री शेरबहादुर देउवाले बिहिबार बिहानर आफ्नो पदबाट राजीनामा दिएका छन् । केही समयअघि प्रधानमन्त्री निवास बालुवाटारबाट सम्बोधन गर्दै देउवाले राजीनामा घोषणा गरेका हुन् । देशबासीका नाममा करिव १५ मिनेट सम्बोधन गरेका देउवाले कार्यकाल सफल बनाउन सघाउने मन्त्री, कर्मचारी, पार्टीका नेता लगायतलाई धन्यवाद दिएका छन् ।
सम्बोधनका क्रममा देउवाले आफ्नो सरकारले गरेका कामहरुको जानकारी गराएका थिए । आफ्नो नेतृत्वको सरकारले संविधान कार्यान्वयनको महत्वपूर्ण कार्य पुरा गरेको देउवाले बताए । स्थानीय तह, प्रदेश र प्रतिनिधिसभाको निर्वाचन आफूले सफलतापूर्वक सम्पन्न गराएको देउवाले बताए । संविधान कार्यान्वयनमा आएकोले राजनीतिक संक्रमणको अन्त्य भएको देउवाको धारणा थियो ।
देउवाले राजनीमा दिए लगत्तै एमाले अध्यक्ष केपी शर्मा ओली प्रधानमन्त्रीमा नियुक्त भएका छन् । राष्ट्रपति विद्यादेवी भण्डारीले अहिले भरखरै ओलीलाई प्रधानमन्त्रीमा नियुक्त गरेकी हुन् ।
राष्ट्रपति कार्यालयका प्रवक्ता कूलप्रसाद चुडालकाअनुसार ओलीले आजै ४ बजे सपथ लिनेछन् । ओली दोस्रो पटक प्रधानमन्त्री बनेका छन् । यसअघि उनी २०७२ असोजदेखि करीब ९ महीना प्रधानमन्त्री भएका थिए ।

प्रतिकृया दिनुहोस

सम्बन्धित समाचार