राष्ट्रपतिमा भण्डारी नै निर्वाचित

-- नेपाली टाइम्स अस्ट्रेलिया / प्रकाशित मिति : मङ्लबार, फाल्गुन २९, २०७४

काठमाडौं– वर्तमान राष्ट्रपति विद्यादेवी भण्डारी मुलुकको तेस्रो राष्ट्रपतिमा निर्वाचित हुनु भएको छ । भण्डारी वाम गठबन्धनको तर्फबाट राष्ट्रपतिको उम्मेदवार बन्नु भएको थियो । भण्डारीले कांग्रेसको तर्फबाट उम्मेदवार बन्नु भएकी नेपाली कांग्रेसकी लक्ष्मी राईलाई पराजित गर्नु भएको हो ।
निर्वाचन भण्डारीले ३९ हजार २७५ मतभार प्राप्त गर्नु भएको छ भने राईले ११ हजार ७३० मतभार पाउनु भएको छ ।
राष्ट्रपतिमा संघीय र प्रदेश सांसदहरुले मतदान गर्न पाउने व्यवस्था छ ।

संघीय सांसदको एक मतलाई ७९ मतभार दिइन्छ भने प्रदेश सांसद एक मतलाई ४८ मतभार दिइने व्यवस्था छ ।

नवनिर्वाचित राष्ट्रपति विद्यादेवी भण्डारीले भोलि बुधबार पद तथा गोपनीयताको सपथ लिने कार्यक्रम छ । सपथको समय बुधबार दिउँसो ४ बजेका लागि तोकिएको छ । राष्ट्रपतिलाई प्रधानन्यायाधीशले सपथ गराउने प्रचलन छ ।