काठमाडौं- वागमती सफाइ महाअभिनय आज शनिवार १ सय ५० औं सप्ताहमा प्रवेश गरेको छ । यो अवसरमा अधिकार सम्पन्न वागमती सभ्यता एकीकृत विकास समितिले आजदेखि गुह्येश्वरीमा दुई दिने ‘वागमती महोत्सव’ आयोजना गरेको छ ।
महोत्सव उद्घाटन गर्दै राष्ट्रपति विद्यादेवी भण्डारीले उच्च सांस्कृतिक, धार्मिक र सभ्यताको धरोहर वागमती नदीको अस्तित्व संकटमा परेकाले जीवन्त बनाउन सबै जुट्नु पर्ने धारणा व्यक्ति गर्नु भयो । समारोहलाई सम्बोधन गर्दै राष्ट्रपति भण्डारीले हाम्रो जन्मदेखि मृत्युसम्म सम्बन्ध राख्ने, भावनात्मक सम्बन्ध गांसिएको वागमती नदीलाई स्वच्छ राख्नु हामी सबै नेपालीको दायित्व भएको बताउनु भयो ।
उक्त अवसरमा कार्यवहाक प्रधानमन्त्री तथा भौतिक पूर्वाधार एवम् यातायातमन्त्री विजयकुमार गच्छदारले वागमती नेपालको धर्म, संस्कृति सभ्यतालाई प्रतिनिधित्व गर्ने नदी भएकाले यसको स्वच्छतामा सबैको ध्यान जानुपर्ने बताउनु भयो ।
पूर्व मुख्यसचिव तथा वागमती सफाइ महाअभियानका प्रमुख अभियानकर्मी लीलामणि पौडेलले नदी फोहर बनाउनेले नै सफाइ नगरे नदीलाई प्राकृतिक अवस्थामा फर्काउन नसकिने भएकाले नागरिक टोलटोलबाट सफाइमा जुट्नुपर्ने बताउनुभयो ।
समितिका अध्यक्ष किशोरकुमार शाक्यले वागमती सफाइका लागि जनचेतनामूलक अभियान सुरु भएपछि यसका सहायक नदी र देशभरका अन्य पोखरी, तालतलैया पनि सफा गर्न स्थानीयवासी जुट्नु सकारात्मक भएको बताउनुभयो ।
२०७० जेठ ५ गते शनिबारदेखि वागमती सफाइ महाअभियान प्रारम्भ भएको थियो । यो अभियानपछि सुन्दरीजलबाट गुह्येश्वरीसम्मको वागमती सफा हुनुका साथै ४० वर्षपछि गुह्येश्वरी क्षेत्रको नदीमा माछा खेल्न थालेका छन् । समिति परिसरमा निर्मित बाल उद्यानको पनि शनिवार बिहान नै राष्ट्रपति भण्डारीले उद्घाटन गर्नुभयो ।
भोलिसम्म चल्ने महोत्सवमा वागमतीसंग सम्बन्धित तस्बिर, चित्रकलासहित ऐतिहासिक महत्वका सामग्रीहरु प्रदर्शनीमा राखिएको छ ।

प्रतिकृया दिनुहोस

सम्बन्धित समाचार

समानुपातिकको मतगणना जारी

/बिहि, मंसिर २८, २०७४