मोदीको भ्रमणका लागि जनकपुरमा उच्च सुरक्षा सतर्कता

-- नेपाली टाईम्स अष्ट्रेलिया / प्रकाशित मिति : बिहिबार, बैशाख २७, २०७५

काठमाडौं– भारतीय प्रधानमन्त्री नरेन्द्र मोदीको नेपाल भ्रमणका लागि प्रदेश नम्बर २ को राजधानी जनकपुरको सुरक्षा व्यस्था कडा पारिएको छ । यसका साथै जनकपुरमा भोलि शुक्रवार सार्वजनिक विदाको घोषणा गरिएको छ ।
भारतीय प्रधानमन्त्री मोदीको भ्रमणको मौका पारेर जनकपुर क्षेत्रमा सुरक्षा व्यवस्था कडा बनाइएको छ । जनकपुर आसपासका क्षेत्रमा माक्स लगाएर हिँड्न समेत प्रतिबन्ध लगाइएको छ ।
जिल्ला प्रहरी कार्यालयले जानकी मन्दिर, बाह्रविघा मैदानको १०० मिटर क्षेत्र र जनकपुर विमानस्थलदेखि बाह्र विघा मैदानको सडक छेउछाउमा धारिलो वस्तु, हेलमेट, झोला, पोका र माक्स लगाएर हिँड्न पनि निषेध गरेको हो ।
मोदीको भ्रमण कार्यक्रमलाई मध्यनजर गर्दै शुक्रवार बिहान १० बजेदेखि हेलमेट, झोला, पोका र माक्स लगाउन प्रतिबन्ध गरिएको प्रहरीले सूचना निकालेर जानकारी दिएको छ । मोदीको नागरिक अभिनन्दन हुने ठाउँ बाह्रविघा मैदानमा पनि हेलमेट र माक्स लगाएर नजान आग्रह गरिएको छ ।
दुई दिने नेपाल भ्रमणका लागि भारतीय प्रधानमन्त्री नरेन्द्र मोदी भोलि शुक्रबार जनकपुर आउँदैछन् । मोदीले जानकी मन्दिरमा पूजा गर्ने कार्यक्रम छ भने जनकपुर उपमहानगरपालिकाले मोदीको सम्मानमा बाह्रविघा मैदानमा नागरिक अभिनन्दन कार्यक्रम राखेको छ ।
जनकपुरमा नागरिक अभिनन्दनमा सहभागि भए लगत्तै मोदी काठमाडौँ आउने कार्यक्रम छ ।