नरेन्द्र मोदी काठमाडौंमा

प्रधानमन्त्री ओलीसंग वन टु वन वार्ता
-- नेपाली टाईम्स अष्ट्रेलिया / प्रकाशित मिति : शुक्रबार, बैशाख २८, २०७५

काठमाडौ– भारतीय प्रधानमन्त्री नरेन्द्र मोदी शुक्रवार अपहरान्न काठमाडौं आइपुगेका छन् । दुई दिने धार्मिक तथा साँस्कृतिक भ्रमणको लागि शुक्रबार बिहान जनकपुर आएका प्रधानमन्त्री मोदी त्यहाँको कार्यक्रम सकेर काठमाडौ आएका हुन् ।
भारतीय प्रधानमन्त्री मोदीको भ्रमण हुने मार्गहरुमा आवश्यक ट्राफिक व्यवस्थापन भइरहेको छ । सकेसम्म छोटो मार्गबाट उहाँको यात्रा हुने व्यवस्था मिलाइएको महानगरीय ट्राफिक प्रहरी महाशाखाका नायब प्रहरी उपरीक्षक मुकुन्द मरासिनीले बताउनुभयो । उहाँ सवार हुने मार्गमा १० मिनेटअघि मात्र सडक खाली गरिनेछ । अत्यावश्यक सवारीसाधन र एम्बुलेन्सहरुलाई भने जुनसकै समयमा आवागमन गर्न दिइनेछ ।
काठमाडौँमा शुक्रबार बिहानैदेखि सडकमा सवारी आवागमन पातलो देखिएको छ । मुख्य स्थानमा सरसफाइका साथै विभिन्न तुल, ब्यानर सजाइएको छ भने चोकचोकमा नेपाल भारतका झण्डाहरु फहराइएका छन् । प्रधानमन्त्री मोदीले शनिबार मुक्तिनाथको दर्शन गर्ने र त्यसपछि स्वदेश फर्कने कार्यक्रम छ ।

वन टु वन वार्ता
प्रधानमन्त्री केपी शर्मा ओली र नेपालको राजकीय भ्रमणमा रहनुभएका भारतका प्रधानमन्त्री नरेन्द्र मोदीबीचको भेटवार्ता सम्पन्न भएको छ ।
बत्तिसपुतली, काठमाडौंस्थित द्वारिकाज होटलमा शुक्रबार भएको एक्लाएक्लै भेटवार्तामा भएको द्विपक्षीय आपसी हितका विविध विषयमा विचारविमर्श भएको बताइएको छ । उक्त भेटवार्तापछि दुवै प्रधानमन्त्री नेतृत्वको प्रतिनिधिमण्डलस्तरीय वार्ता शुरु भएको छ । शुक्रबार साँझ नै दुई प्रधानमन्त्रीले संयुक्त रुपमा अरुण तेस्रो जलविद्युत आयोजनाको शिलान्यास गरेका छन् ।
राष्ट्रपतिसंग भेट
जनकपुरबाट काठमाडौं आएपछि भारतीय प्रधानमन्त्री नरेन्द्र मोदीले शुक्रबार साँझ राष्ट्रपति विद्यादेवी भण्डारी र उपराष्ट्रपति नन्दबहादुर पुनसँग छुट्टाछुट्टै भेटवार्ता गरेका छन् । राष्ट्रपति कार्यालय शितलनिवासमा भएको भेटमा दुई देशबीचको सम्बन्ध, आपसी हित र चासोको विषायमा कुराकानी भएको राष्ट्रपति कार्यालयले जनाएको छ ।