देशैभरी बढ्यो गर्मी

-- नेपाली टाईम्स अष्ट्रेलिया / प्रकाशित मिति : आइतवार, जेष्ठ १३, २०७५

काठमाडौं– दुई दिनदेखि काठमाडौं लगायत देशैभरी गर्मी ह्वात्तै बढेको छ । पूर्वदेखि पश्चिमसम्म नै एक्कासी गर्मी बढेको हो । एक्कासी बढेको गर्मीले जनजीवन समेत प्रभावित भएको छ ।
काठमाडौंमा हिजो शनिबार यस वर्षकै सबैभन्दा बढी गर्मी महशुस गरियो । शनिबार उपत्यकाको तापक्रम ३१ दशमलव ५ डिग्री सेल्सियस पुग्यो । शुक्रबार उपत्यकाको तापक्रम ३१ डिग्री थियो भने गत वैशाख १० गते ३० दशमलव २ र गत जेठ ८ गतेको तापक्रम ३० डिग्री थियो । गतवर्ष अंग्रेजी महिनाको मे २६ तारिखमा उपत्यकाको अधिकतम तापक्रम २९ दशमलव ८ डिग्री मापन भएको महाशाखाले जनाएको छ ।
हिजो शनिबार नेपालगन्जमा यो वर्षकै सबैभन्दा बढी गर्मी महसुस गरिएको छ । एक दिनको अन्तरमा त्यहाँको तापक्रम ३ डिग्री बढेको हो । शनिबार त्यस क्षेत्रको अधिकतम तापक्रम ४२ दशमलव २ डिग्री सेल्सियस रेर्कड भएको जल तथा मौसम पूर्वानुमान महाशाखाले जनाएको छ । शुक्रबार नेपालगन्जको अधिकतम तापक्रम ३९ दशमलव ४ डिग्री सेल्सियस रहेको महाशाखाको तथ्यांक छ ।
अघिल्लो वर्ष अंग्रेजी महिनाको मे २६ तारिखमा नेपालगन्जको तापक्रम ४१ दशमलव २ डिग्री थियो । त्यसअघि पश्चिम तराईमा जेठ ८ गते सबैभन्दा बढी तापक्रम रेकर्ड भएको थियो, उक्त दिन धनगढीको अधिकतम तापक्रम ४१ डिग्री मापन भएको थियो । त्यसैगरी गत वैशाख २५ गते नेपालगन्जको अधिकतम तापक्रम ४० दशमलव ३ डिग्री सेल्सियस मापन भएको महाशाखको तथ्यांक छ ।
शनिबार धनगढीको तापक्रम ४१ दशमलव २ मापन भएको छ भने दीपायलको ३९, दाङको ३७ दशमलव ४, भैरहवाको ३६ दशमलव ३ र सिमराको ३५ दशमलव ५ डिग्री तापक्रम रेकर्ड भएको छ । पश्चिम तराईको तापक्रम तत्काल घट्ने मौसमी गतिविधि नदेखिएको मौसमविद् शान्ति कँडेलले बताउनुभयो ।
मनसुन शुरू नभएसम्म उपत्यकामा गर्मी अझै बढ्न सक्ने मौसमविद्हको भनाइ छ ।