आज गणतन्त्र दिवस

-- नेपाली टाईम्स अष्ट्रेलिया / प्रकाशित मिति : मङ्लबार, जेष्ठ १५, २०७५

काठमाडौं– संघीय लोकतान्त्रिक गणतन्त्र नेपाल घोषणा भएको ११ बर्ष पुगेको छ । २०६२/०६३ को दोस्रो जन आन्दोलनको बलमा बनेको तत्कालिन संविधानसभाको पहिलो वैठकले राजसंस्थाको अन्त्य गर्दै मुलुकमा गणतन्त्रात्मक राज्य व्यवस्थाको सुरुवात गरेको घोषणा गरेको थियो ।
दुई सय ३८ वर्ष लामो शाहवंश राजपरम्पराको अन्त्यको घोषणा भएको उक्त दिनलाई प्रत्येक वर्ष गणतन्त्र दिवसका रुपमा मनाउन थालिएको हो । गणतन्त्र दिवसको उपलक्ष्यमा सरकारले यसपटक १४ गते देखि १६ गते सम्म विभिन्न कार्यक्रम गरि मनाउने निर्णय गरिसकेको छ । प्रधानमन्त्रीको अध्यक्षतामा गठन भएको गणतन्त्र मूल समारोह समितिले काठमाडौंको टुंडिखेलमा विशेष कार्यक्रमको आयोजना गरेको छ । उक्त कार्यक्रममा राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, सभामुख कृष्णबहादुर महरा, विभिन्न मन्त्रीहरु, संबैधानिक आयोगका प्रमुख तथा कूटनीतिक नियोगका प्रतिनिधिको उपस्थीति रहने छ ।
यस्तो छ शुभकामना
राष्ट्रपति विद्यादेवी भण्डारीले सबै नेपालीलाई संघीय लोकतान्त्रिक गणतन्त्रात्मक शासन व्यवस्थाको माध्यमद्वारा राष्ट्रिय एकता प्रवद्र्धन र समृद्ध राष्ट्र निर्माणमा एक जुट हुन प्रेरणा प्रदान गर्न सकोस् भन्ने शुभकामना व्यक्त गरेकी छिन् ।
गणतन्त्र दिवसका अवसरमा शुभकामना सन्देश दिँदै उनले जनभावनाको कदर गर्दै संविधान र कानूनद्वारा निर्दिष्ट दायित्व पूरा गर्न कटिबद्ध हुनुपर्ने महत्वपूर्ण घडी आएको बताएकी छिन् । सन्देशमा भनिएको छ(ुमुलुकमा सुदृढ शान्ति कायम गर्ने, राजनीतिक स्थायित्व हासिल गर्ने र आर्थिक विकास गर्ने नेपाली जनताको उत्कृष्ट चाहनालाई साकार पार्ने अवसर प्राप्त भएको छ ।ु
उपराष्ट्रपति नन्दबहादुर पुनले गणतन्त्र प्राप्तिका लागि विभिन्न कालखण्डमा भएका जनान्दोलन, सशस्त्र संघर्ष, जनयुद्व र २०६२–६३ को ऐतिहासिक जनआन्दोलनमा जीवन बलिदान दिने सम्पूर्ण शहीदलाई श्रद्धाञ्जलि अर्पण गर्दै संघर्षका क्रममा घाइते हुनुभएका योद्धाको स्वाथ्यलाभको कामना गरेका छन् । उनले यस दिवसमार्फत गणतन्त्रको सुदृढीकरण तथा आर्थिक समृद्धिका लागि सबै नेपालीलाई ऐक्यबद्वता र हातेमालो गर्न आह्वानसमेत गरेका छन् ।