आजदेखि विश्वकप फुटबल

काठमाडौं– विश्व फुटबलको सबैभन्दा महत्वपूर्ण मेला फिफा विश्वकप २०१८ आज बिहीबारदेखि रुसको राजधानी मस्कोमा प्रारम्भ हुँदैछ । प्रतियोगिताको उद्घाटन खेलमा आयोजक रसिया र साउदी अरेबियाबीच पहिलो खेल हुनेछ ।
प्रतियोगितामा डिफेन्डीङ च्याम्पियन जर्मनी, स्पेन, ब्राजिल र फ्रान्सलाई उपाधिको प्रमुख दावेदारको रुपमा हेरिएको छ । व्यक्तिगत रुपमा अब्बल खेलाडी भएकै कारण बेल्जियम, अर्जेन्टिना, पोर्चुगल र इंग्ल्यान्डको पनि सम्भावना रहेको छ ।
दावेदार सबै टोलीमा गोलरक्षकको भूमिका महत्त्वपूर्ण हुने गर्दछ । समूह चरणमा टोलीहरुलाई तुलनात्मक जित दर्ता गर्न सहज हुन्छ । दोस्रो चरण पार गरेपछि भने उत्कृष्ट बिचको लडाईमा गोलरक्षकको भूमिका देखिने गर्छ ।
स्पेनका गोलरक्षक डेबिड डे हेया पछिल्ला केहि सिजनदेखि उत्कृष्ट लयमा छन् । छनोटका क्रममा पनि उनले राष्ट्रिय टोलीबाट यादगार प्रदर्शन गरे । म्यानचेस्टर युनाइटेडलाई लगातार उत्कृष्ट नतिजा दिलाइरहेका गोलरक्षक डे हेयामै स्पेनी टोलीको आशा रहेको छ ।
फ्रान्सका गोलरक्षक ह्युगो लोरिस पनि क्लब फुटबलमा राम्रो सिजन बिताएर आएका छन् । फ्रान्सेली टोलीका कप्तान समेत रहेका लोरिसका लागि यो राष्ट्रिय टोलीबाट अन्तिम प्रतियोगिता हुन सक्छ । त्यसैले पनि उनले टोलीको प्रदर्शनमा थप महत्त्व बोकेका छन् ।जर्मनीका म्यानुएल नोएर सिजनको पछिल्लो भाग विश्राममै रहे । खुट्टाको चोटका कारण मैदान बाहिर रहेका उनले विश्वकपका अभ्यास खेलको प्रदर्शनसँगै खेलमा फर्किएको सिद्ध पारेका छन् । अब पुरानै लयलाई समातेर टोलीको नेतृत्व गर्नु उनलाई चुनौती हुनेछ ।
यसैबीच, सन् २०२६ को विश्वकप अमेरिका, क्यानडा र मेक्सिकोले संयुक्त रुपमा आयोजना गर्ने भएका छन् । विश्वकप आयोजना गर्ने मरक्कोको प्रस्तावलाई पछि पार्दै तीन राष्ट्रले सहआयोजक बन्ने सौभाग्य प्राप्त गरेका हुन् । फिफामा भएको मतदानमा अमेरिका, क्यानडा र मेक्सिकोको पक्षमा १ सय ३४ राष्ट्रले मत जाहेर गरेका थिए । मरक्कको पक्षमा मात्रै ६५ राष्ट्र उभिए । सन् २०२६ को विश्वकप अहिलेसम्मकै बृहत हुने छ । फिफाले यसअघि नै विश्वकपमा सहभागी राष्ट्रको संख्या बढाएर ४८ पुर्‍याउने र ३४ दिनसम्म चल्ने प्रतियोगितामा ८० खेल खेलाउने निर्णय गरिसकेको छ । २ सय ११ सदस्य राष्ट्र रहेको फिफाको रुसको राजधानी मस्कोमा भएको ६८ औं साधारणसभामा २ सयले मत हालेका थिए । यसअघि मेक्सिकोले सन् १९७० र ८६ मा गरी दुईपटक र अमेरिकाले १९९४ मा एकपटक विश्वकप आयोजना गरिसकेका छन् । क्यानडाले भने सन् २०१५ मा महिला विश्वकपको सफल आयोजना गरेको थियो ।