अन्ततः डा. केसीले तोडे अनसन

डा. केसीका अधिकांश माग पूरा गर्ने लिखित सम्झौता
-- नेपाली टाईम्स अष्ट्रेलिया / प्रकाशित मिति : शुक्रबार, साउन ११, २०७५

काठमाडौं– सरकारसँगको सहमतिपछि डा.गोविन्द केसीले २७ दिन लामो अनशन तोडेका छन् । डा.केसीलाई प्राध्यापक केदारभक्त माथेमा र नेकपा नेता सुवास नेम्वाङले जुस खुवाएर अनशन तोडाएका छन् । डा. केसीका अधिकांश माग पूरा गर्ने लिखित सम्झौतापछि उनले अनशन तोडेका हुन् ।
सरकारले संसदमा दर्ता गरेको चिकित्सा शिक्षा विधेयकमा डा. केसीका तर्फबाट संशोधनका लागि माग भएका २२ वटा बुँदामा संसदीय प्रक्रिया अनुसार संशोधन गर्न सहमति गरेको छ ।
यसअघि अन्य विषयमा सहमति भए पनि काठमाडौं उपत्यकामा १० वर्षसम्म नयाँ मेडिकल कलेज खोल्न नपाइने विषयमा सहमति हुन नसक्दा वार्ता लम्बिएको थियो ।
अहिले भएको सहमति अनुसार संसदबाट विधेयक पारित हुने हो भने अबको १० वर्षसम्म काठमाडौं उपत्यकामा नयाँ मेडिकल कलेज खुल्ने छैनन् ।
आशयपत्र पाइसकेकाको हकमा सरकारले त्यस्ता प्रस्तावित कलेजको सम्पत्ति खरिद गर्ने वा उपत्यका बाहिर सञ्चालनका लागि प्रोत्साहन सुविधा उपलब्ध गराउने सहमति भएको छ ।