लामालाई एक वर्ष कैद हुने

-- नेपाली टाईम्स अष्ट्रेलिया / प्रकाशित मिति : शुक्रबार, साउन २५, २०७५

काठमाडौं– गुण्डा नाइकेको रुपमा चिनाइएका गणेश लामा सम्पत्ति शुद्धीकरण मुद्दामा दोषी ठहर भएका छन् । अदालतका अध्यक्ष बाबुराम रेग्मी, न्यायाधिश द्वारिकामान जोशी तथा रत्नबहादुर बागचन्दको इजलासले लामालाई सम्पत्ति शुद्धिकरण मुद्दामा दोषी ठहर गर्दै हिजो बिहीबार सजाय सुनाएको हो ।
बिशेष अदालतले लामालाई सम्पत्ति शुद्धीकरण मुद्दामा एक वर्ष कैद तथा एक करोड बिगो तिराउने फैसला गरेको हो । लामामाथि १ करोड ४० लाख ५० हजार रुपैयाँ बिगो दाबी गर्दै २०७० जेठमा मुद्दा दर्ता भएको थियो ।
हाल लामा केन्द्रीय कारागारमा रहेका छन् । लामालाई काठमाडौं प्रहरी परिसरको टोलीले गौशालामा पेस्तोलसहित पक्राउ गरेको थियो । लामाले गुन्डागर्दी लगायत आपराधिक गतिविधिबाट अकुत सम्पत्ति कमाएको भन्दै सम्पत्ति शुद्धीकरण अनुसन्धान विभागले मुद्दा दायर गरेको थियो ।
प्रहरीको केन्द्रीय अनुसन्धान ब्युरो ९सिआइबी० ले गरेको अनुसन्धानमा लामासहित पाँचजना विरुद्ध सम्पत्ति शुद्धीकरण विभागले २०७० साल जेठ ५ गते मुद्दा दायर गरेको थियो ।