विराटनगरको बम विष्फोटको आशंकामा ९ जना नियन्त्रणमा

-- नेपाली टाईम्स अष्ट्रेलिया / प्रकाशित मिति : सोमवार, साउन २८, २०७५

विराटनगर– विराटनगर महानगरपालिकामा हिजो आइतबार भएको विष्फोट प्रेसर कुकर बमबाट भएको प्रहरीले अनुमान गरेको छ । महानगरपालिका प्रमुख भीम पराजुलीको कार्यकक्ष नजिकै भएको उक्त विष्फोटलगत्तै प्रहरीले नगरको सुरक्षा अवस्था कडा पारेको छ । घटनाबारे मोरङ प्रहरी प्रमुख एसपी मनोजकुमार केसीले बम विष्फोटको जिम्मा कसैले नलिए पनि सुक्ष्म ढंगबाट घटनाको अनुसन्धान थालिएको बताए ।

एसपी केसीले घटनामा जोडिएको आशंकामा ९ जना व्यक्तिलाई नियन्त्रणमा लिएर अनुसन्धान र सोधपुछ गर्ने काम भइरहेको जानकारी गराएका छन् ।
नियन्त्रणमा लिइएकाहरुको नाम र ठेगाना गोप्य राखिएको छ । पक्राउ परेकाहरुको राजनैतिक आवद्धता र विगतका पृष्ठभूमिका बारेमा प्रहरीले अनुसन्धान गरिरहेको छ । प्रहरीले हाल सिसी टिभी फुटेज हेरेर पनि घटनाका बारेमा पत्ता लगाउने प्रयास गरिरहेको जनाएको छ ।

विष्फोटबाट नगरपालिका कार्यालयको झ्यालका सिसा फुटेका छन् भने मेयर पराजुलीले प्रयोग गर्दै आएको ४९४ नम्बरको गाडीमा क्षति पुगेको छ । ष्फोटपछि धुवाँको मुस्लो छुट्दा कार्यालयका कर्मचारी र सेवाग्राहीबीच भागदौड मच्चिएको थियो । विष्फोटको आवाजले कार्यालय सहयोगी शिवचन्द्र ठाकुर बेहोस भएको प्रहरीले जनाएको छ । ठाकुरको कोसी अञ्चल अस्पताल विराटनगरमा उपचार भएको छ ।

महानगरपालिकाका एक कर्मचारीका अनुसार केही दिन अघि नेत्रविक्रम चन्द ‘विप्लव’ नेत्रृत्वको नेपाल कम्युनिष्ट पार्टीले पत्र पठाएरै चन्दा माग गरेको थियो ।