अमेरिकी डलर अहिले सम्मकै महंगो

-- नेपाली टाईम्स अष्ट्रेलिया / प्रकाशित मिति : बिहिबार, भदौ २१, २०७५

काठमाडौं– नेपालमा अमेरिकी डलरको भाउ ११५ रुपैयाँ ११ पैसा पुगेको छ । नेपाल राष्ट्र बैंकले आज बिहीबारका लागि ११५ रुपैयाँ ११ पैसा रिफरेन्स रेट तोकेको हो । नेपाली बैंकहरुले दिनभरी गरेको कारोबारका आधारमा राष्ट्र बैंकले रिफरेन्स रेट निर्धारण गर्छ । अन्तर्राष्ट्रिय बजारमा डलरको माग बढेपछि नेपाली रुपैयाँ अहिलेसम्मकै कमजोर देखिएको हो । डलरको भाउ १ सय २० रुपैयाँसम्म पुग्ने अनुमान गरिएको छ ।
भारतले पेट्रोलियम पदार्थको स्टक बढाउन डलर खर्च गरिरहेकाले त्यसको असर नेपाली बजारमा देखिएको हो । भारुसँग स्थिर विनिमय दर भएका कारण त्यहाँको प्रभाव नेपाली रुपैयाँमा परेको हो ।
१०० भारु बराबर नेपाली १६० रुपैयाँको स्थिर विनिमय दर छ । भारतको अर्थतन्त्रमा अलिकति तलमाथि हुँदा त्यसको प्रत्यक्ष असर नेपाली बजारमा पर्छ । डलर उक्लिँदा आयातित सबै बस्तु तथा सेवा महँगिन्छ ।
डलर बढ्दा विदेशमा काम गर्न गएका नेपालीले रेमिटेन्स पठाउँदा उनीहरुलाई बढि फाइदा हुन्छ । दसैंको मुखमा मूल्य बढेकाले नेपालमा बजार भाउ महँगिने निश्चित छ ।