निर्मलाको पक्षमा न्याय माग्दै देशव्यापी प्रदर्शन

-- नेपाली टाईम्स अष्ट्रेलिया / प्रकाशित मिति : आइतवार, भदौ ३१, २०७५

काठमाडौं– १३ वर्षीया बालिका निर्मला पन्तको बलात्कारपछि हत्या भएको ५२ दिन पुगिसक्दा समेत बलात्कारी तथा हत्यारा को हो भन्ने पुष्टि हुन नसक्दा प्रहरी प्रशासनसहित सरकारविरुद्धको आन्दोलन सशक्त हुने सम्भावना बढेको छ । निर्मलाको हत्यामा उच्चस्तरीय अनुसन्धान कमिटीले प्रहरीको लापरबाही भएको निष्कर्ष निकालेपछि र अभिभावकले पनि प्रहरीले प्रमाण नष्ट गरेको आरोप लगाएपछि घटनाले नयाँ रुप लिएको हो ।
गत साउन ११ गते कञ्चनपुर नगरपालिकाको वडा नम्बर १९ स्थित उखुबारीमा बीभत्स ढंगले हत्या गरिएको अवस्थामा निर्मलाको शव फेला परेको थियो । उनलाई बलात्कारपछि हत्या गरिएको थियो । साउन १० गते उनी पढ्न भनी साथी रोशनी भनिने आँचल बमको घरमा गएकी थिइन् । रोशनीको घर गएकी पन्तको बलात्कारपछि हत्या गरिएको अवस्थामा भोलिपल्ट उखुबारीमा शव भेटिएको थियो । तर, लामो समयसम्म बम दिदीबहिनीलाई स्थानीय प्रहरीले अनुसन्धानको दायरामा ल्याएको थिएन । रोशनीको घरबाट उनी आफ्नो घरमा जान पाइनन् । तर रोशनी हाजिर जमानी र बबिता ३० हजार रुपियाँ धरौटीमा छुटेकी हुन् । निर्मलाका अभिभावकले प्रहरीले प्रमाण नष्ट गरेको बताउँदै आएका छन् । न्याय माग्न काठमाडौं धाएका उनका बुबा यज्ञराज र आमा दुर्गादेवीले दोषीलाई कानुन कठघरामा नउभ्याउँदासम्म घर नफर्किने बताउनुभएको छ । उहाँहरुले गृहमन्त्री रामबहादुर थापालाई भेटिसक्नुभएको छ । भेटमा गृहमन्त्री थापाले दोषीलाई कारबाही गर्ने आश्वासन दिएको दाबी गरिएको छ ।
यसैबच निर्मलालाई न्याय दिन माग गर्दै राजधानी लगायत देशभर प्रदर्शन भइरहेको छ । शनिबार माइतीघर मण्डलाबाट शुरु भएको विरोध प्रदर्शन बानेश्वर पुगेर सभामा परिणत भएको थियो । जुलुसमा निर्मलाका बुबा यज्ञराज र आमा दुर्गादेवीसमेत पुग्नुभएको थियो ।
बागलुङमा पनि निर्मला पन्तको न्यायका लागि हस्ताक्षर संकलनसँगैं दीप प्रज्वलन गरिएको छ । निर्मलाको हत्या भएको ५२ दिन वितिसक्दा पनि अपराधी पत्ता नलागेको र प्रहरी प्रशासनले हत्यारा पत्ता लगाउँन तदारुकता नदेखाएको भन्दैं दबावस्वरुप शनिबार देशव्यापी रुपमा आयोजना गरिएको आयोजक निर्मलाका निम्ति न्यायका बागलुङ संयोजक साधना पन्तले बताइन् । सरकारले अपराधीलाई पक्राउ गरेर कारबाही गर्न नसकेको विरोधमा देशव्यापी भइरहेको विरोधमा नेपालगञ्जले पनि एक्यबद्धता जनाएको छ । ‘निर्मलाका निम्ति न्याय’ भन्दै शनिबार आँखामा कालो पट्टी बाँधेर प्रदर्शन गरियो । बिहान कोहलपुर र अपरान्ह नेपालगञ्जमा ‘पीडितलाई न्याय दे, अपराधीलाई कारबाही गर’ भन्दै नाराबाजी गरिएको थियो । विद्यार्थी, युवा र नागरिक समाजका अगुवा स्वस्फूर्त जम्मा भई दश मिनेटमा आँखामा पट्टी बाँधेर विरोध गरेका थिए ।
बलात्कारपछि हत्या गरिएकी कन्चनपुरकी १३ वर्षीया बालिका निर्मला पन्तको पक्षमा न्यायको माग गर्दै शनिबार म्याग्दीमा विरोध प्रदर्शन भएको छ । निर्मला पन्तको न्यायको माग राख्दै देशैभरी महिला तथा बालबालिकामाथि भैरहेको हिंसा, बलात्कार र हत्याको विरोधमा म्याग्दीका महिलाहरुले सदरमुकाम बेनीमा विरोध र्‍याली आयोजना गरेका हुन् । र्‍यालीमा सहभागी महिलाहरुले बलात्कार र हत्याको विरुद्धमा चर्को रुपमा आवाज उठाएका छन् । उनीहरुले बलात्कारीलाई सामाजिक बहिष्कार गरौं, महिलालाई रेप होइन सेभ गरौं, दोषीलाई कडा कार्वाही गर, शान्तिसुरक्षा कायम गर, महिलामैत्री कानुन तत्काल कार्यान्वयन गर्नुपर्ने र कानुनी राज्यको स्थापना हुनुपर्ने जस्ता नाराहरु लगाएका थिए । महिलाहरुले टाउकोमा कालो पट्टी बाँधेर प्रदर्शनमा उत्रिएका थिए ।