समुन्द्री सुरक्षाबारे कार्यशाला जनवरीमा

-- गोपाल छन्त्याल /नेपाली टाईम्स अष्ट्रेलिया / प्रकाशित मिति : सोमवार, पुस ९, २०७५

गर्मी सिजन सुरु भएसँगै समुन्द्री तटमा डुबुल्की मार्न जानेको सँख्या बढ्दो छ । नेपाली समुदाय पनि यसप्रति आकर्षित नहुने कुरै भएन । तर, आवश्यक ज्ञान र सीपको अभावमा ज्यानै जाने खतरा पनि त्यतिकै छ । समुन्द्री स्नानबारे आधारभुत जानकारी दिने उद्देश्यले भिजन फर मोटिभेसन (भिएफएम)को आयोजनामा समुन्द्री सुरक्षाबारे आगामी जनवरीमा कार्यशाला हुने भएको छ । न्यूनतम् प्रवेश शुल्क राखेर तामारामा सर्फ क्लबसँगका सहकार्य गरेर भिएफएमले जनवरी १३ मा उक्त कार्यक्रम सञ्चालन गर्न लागेको हो ।

भिएफएमले स्थापनाकाल देखि सिड्नी क्षेत्रमा नेपाली समुदायका लागि रचनात्मक कार्यक्रमहरु गर्दै आएको छ । तालिम प्राप्त प्रशिक्षक (लाईफ सेभरहरु) मार्फत समुन्द्रमै लगेर समुन्द्रको प्रकृति, छालको अवस्था र सुरक्षाका उपायहरु व्यवहारिक रुपमै देखाउने हुनाले कार्यशाल प्रभावकारी हुने भिएफएमका महेश प्रसाइले जानकारी दिए । ‘हाम्रो संस्था विगतमा पनि यस्तो कार्यक्रम गरेको थियो, त्यसैलाई हामीले निरन्तरता दिएको हो’, उनले भने । गर्मी चढेसँगै बोन्डाई, तामारा लगायतका समुन्द्री तटमा अष्ट्रेलियनका साथै नेपाली समुदायको उपस्थिति बाक्लिदो छ । समुन्द्री स्नानबारे आधारभुत जानकारी नहुँदा अहिलेसम्म ६ भन्दा बढी नेपालीको ज्यान गइसकेको बताईएको छ ।