प्रचण्डविरुद्ध अमेरिकामा उजुरी, ‘नो इन्भेष्टिगेसन’ को सर्कुलर !

-- नेपाली टाईम्स अष्ट्रेलिया / प्रकाशित मिति : मङ्लबार, चैत्र ५, २०७५

काठमाडौं– पत्नी सीता दाहालको उपचारका लागि गएका नेकपाका अध्यक्ष पुष्पकमल दाहाल प्रचण्ड विरुद्ध एक नेपालीले अमेरिकामा उजुरी गरेका छन् ।

सीताको उपचारका लागि प्रचण्ड नेपालबाट अमेरिका प्रस्थान गरेका दिन अमेरिका बस्दै आएका एक नेपालीले प्रचण्ड विरुद्ध उजुरी गरेका हुन् ।

हाल अमेरिका केन्टुकी स्टेट युनिभर्सिटीमा कार्यरत डा‍. तिलक श्रेष्ठले अमेरिकाको बाल्टिमोरस्थित अनुसन्धान सम्बन्धी संघीय ब्यूरोमा उजुरी गरेका छन् ।

प्रचण्ड नेपालबाट अमेरिका प्रस्थान गरेको दिन आइतबार श्रेष्ठले बाल्टिमोरको संघीय व्यूरोमा उजुरी पठाउँदै प्रचण्डको भ्रमणबारे अमेरिकाको अन्य निकायमा जानकारी गराउँन व्यूरोलाई अनुरोध समेत गरेका छन् ।

अमेरिकाले पूर्व आतंककारीको सूचीमासमेत राखेका प्रचण्ड, पत्नीको उपचारका लागि अमेरिका भ्रमण आउन लागेको भन्दै डा. श्रेष्ठले प्रारम्भिक उजुरी गरेका हुन् । उनले थप उजुरीका लागि कसरी पहल गर्ने भन्दै ब्यूरोलाई प्रश्न गरेका छन् ।

प्रचण्डको नेतृत्वमा भएको युद्धमा १७ हजार नेपालीको मृत्यु भएको उनले व्यूरोलाई पठाएको उजुरीमा उल्लेख गरेका छन् । अमेरिकाले आतंकवादलाई माफ नगर्ने र मानवीय कानूनमा प्रतिवद्ध रहेको उनले स्मरण गराएका छन् ।

डा. श्रेष्ठले प्रचण्डबारेको यो जानकारीलाई अमेरिकाको अन्य सम्बन्धित निकायमा पठाउन बाल्टिमोरस्थित अनुसन्धान सम्बन्धी संघीय ब्यूरोलाई आग्रह गरेका छन् ।

यसअघि नेपाली सेनाका महासेनानी कुमार लामालाई बेलायत गएको बेला यस्तै उजुरीका आधारमा सन् २०१३ मा पक्राउ गरिएको थियो ।