राजदूत दाहालद्वारा ओहोदाको प्रमाणपत्र पेश 

-- नेपाली टाईम्स अष्ट्रेलिया / प्रकाशित मिति : बुधबार, कार्तिक २७, २०७६

अष्ट्रेलियाका लागि नव नियुक्त नेपाली राजदूत महामहिम महेश राज दाहालले आज १३ नोभेम्बर २०१९ बुधबारका दिन अष्ट्रेलियाका लागि गभर्नर जनरल महामहिम डेभिड हुर्ले समक्ष राजधानी क्यानबेरा स्थित सरकारी भवनमा आयोजित एक बिशेष कार्यक्रममा आफ्नो ओहोदाको प्रमाणपत्र पेश गर्नु भएको छ ।

प्रमाणपत्र हस्तान्तरण समारोहमा राजदूत दाहालले राष्ट्रपति बिद्या भण्डारीबाट प्राप्त शुभकामा संदेश महामहिम हुर्ले समक्ष ब्यक्त गर्नु भयो । दुताबासले जनाए अनुसार ओहोदाको प्रमाण पत्र हस्तान्तरण कार्यक्रम पश्चात आयोजित भेटघाटमा  महामहिम डेभिड हुर्लेलाई महामहिम राजदुत दाहालले १९६० देखि नेपाल र अष्ट्रेलिया विचको द्दिपक्षीय पारस्परिक सम्बन्ध र आगामी २०२० मा ६० औं बर्षमा  प्रवेश गरेको हाम्रो सम्बन्धका बारे जानकारी गराउनु भएको थियो ।  यसै गरि  महामहिम दाहालले नेपाल अष्ट्रेलिया विचका व्यापार, पर्यटन यसै गरि कृषि र इनर्जी उत्पादनका क्षेत्रमा विस्तार गर्न सकिने लागानीका अबसरका बारेमा पनि आफ्नो धारणा राख्नु भएको थियो।

गभर्नर जनरल महामहिम डेभिड हुर्लेले पनि उक्त अवसरमा महामहिम राजदूत मार्फत वर्तमान नेपालको अवस्था बारे  जानकारी लिनु भएको थियो । कहि वर्षअगाडी गएको महाभूकम्प, पुननिर्माण, पर्यटन तथा दुइ देश बीच भएका पारस्परिक सम्बन्ध र सहकार्यका बिषयमा उक्त भेटघाटमा जानकारी लिदै कार्यकालको सफलताको कामना गर्नु भएको थियो । कार्यक्रममा अष्ट्रेलियन सरकार डिपर्टमेन्ट अफ फरेन एफियर्स एण्ड ट्रेडका चिफ प्रोटोकल, अष्ट्रेलियन सरकारका उच्च अहोदाका व्यक्तित्वहरु र दुताबासका कर्मचारीहरुको उपस्थिति थियो । यस संगै दाहालले लगतै अष्ट्रेलियाका लागि नेपाली राजदूतका रुपमा आफ्नो कार्यभार सम्हाली सक्नु भएको छ ।
सन् २००७ मा स्थापित नेपाली आवासीय दूताबासमा नियुक्त हुने दाहाल चौथा राजदूत हुन् ।  यस अगाडी योगेन्द्र ढकाल र रुद्र कुमार नेपालले आ-आफ्नो कार्यकाल पुरा गरे पश्चात  र लक्की शेर्पाले कार्यभार नसकिदै पदबाट राजिनामा दिइ स्वदेश फर्कीसकेका छन् । महामहिम राजदूत दाहाललाई  सफल कार्यकालको लागि हार्दिक शुभकामना ।
(photo from Nepal embassy Facebook page)