आधा भन्दा बढी संक्रमित उपत्यकामै

-- नेपाली टाईम्स अष्ट्रेलिया / प्रकाशित मिति : सोमवार, अशोज १२, २०७७

काठमाडौं – पछिल्लो एक महिनादेखि काठमाडौं उपत्यकामा कोरोना संक्रमितको संख्या निरन्तर बढिरहेको छ ।

आइतबार मात्रै देशभरका संक्रमितमध्ये ५३ दशमलव ३ प्रतिशत उपत्यकामा मात्र रहेको पाइएको छ ।

आइतबार नयाँ संक्रमित १५ सय ७३ रहेकोमा उपत्यकामा ८ सय ३७ जना छन् ।

यसअघि पनि दैनिक कुल संक्रमितमध्ये उपत्यकामा ५० प्रतिशतको हाराहारीमा संक्रमित हुने गरेका थिए ।

उपत्यका बाहिर सबैभन्दा बढी मोरङमा १ सय ५२, चितवनमा ८३, सुर्खेतमा ७६ र कैलालीमा ५६ जना संक्रमित छन् ।

तथ्यांकअनुसार शनिबार उपत्यकामा ७ सय २४ जना र शुक्रबार ५ सय ५५ जना संक्रमित थिए ।

उपत्यकासहित आइतबार १५ सय ७३ जना नयाँ संक्रमित थप भएका हुन् ।

थपसहित नेपालमा कुल संक्रमित संख्या ७३ हजार ३ सय ९४ पुगेको छ ।

तीमध्ये ४ सय ७७ जनाको मृत्यु भएको छ ।

आइतबार थप १० जनाको मृत्यु भएको हो।

कुल संक्रमितमध्येमा शून्य दशमलव ६५ प्रतिशतको मृत्यु भएको छ ।

संक्रमितमध्ये हालसम्म ५३ हजार ८ सय ९८ जना निको भइसकेका छन् ।

हाल देशभरिमा १९ हजार १९ जना संक्रमित छन् ।

त्यसमा गम्भीर समस्या भएका २ सय २५ जनाको आइसियु र ३३ जनाको भेन्टिलेटरमा उपचार भइरहेको छ ।

उपत्यकाबाहिर बढी संक्रमणको जोखिममा रहेका जिल्लामा मोरङ, रुपन्देही, चितवन र सुर्खेत रहेको स्वास्थ्य तथा जनसंख्या मन्त्रालयले जनाएको छ ।