आजदेखि दशैं प्रारम्भ, पहिलो दिन घटस्थापना

-- नेपाली टाईम्स अष्ट्रेलिया / प्रकाशित मिति : शनिबार, कार्तिक १, २०७७

काठमाडौं – हिन्दू नेपालीहरुको महत्वपूर्ण पर्व वडा दसैं आज (शनिबार) देखि प्रारम्भ भएको छ ।

प्रत्येक वर्ष आश्विन शुक्ल प्रतिपदादेखि पूर्णिमासम्म हर्षोल्लास र धूमधामका साथ वडा दसैं पर्व मनाइन्छ।

वडा दसैंको पहिलो दिन आज घरघरमा वैदिक विधिपूर्वक दियो, कलश र गणेश स्थापना गरी घटस्थापना गरिन्छ ।

आज घटस्थापना गर्ने शुभसाइत बिहान ११ बजेर ४६ मा रहेको पञ्चांग निर्णायक समितिका अध्यक्ष प्रा.डा. रामचन्द्र गौतमले जानकारी दिए ।

यस वर्ष शुभसाइतमा हनुमानढोका दरबारमा रहेको दसैं घरमा घटस्थापना गरिने भएको छ ।

दसैंमा शक्तिकी अधिष्ठात्री देवी दुर्गाको पूजाआराधना गरिन्छ ।

बिहान नजिकको नदी वा चोखो स्थलबाट बालुवा अथवा माटो ल्याइ गाईको गोबरले लिपपोत गरिएको पूजाकोठामा विधिपूर्पक राखेर त्यसमा जौ, धान र मकै छरेर जमरा राख्ने गरिन्छ ।

यस वर्ष कोभिड–१९ महामारीका कारण दसैंमा विगत वर्ष जस्तो रौनक र उत्साह छैन ।

सरकारले पनि दसैंको नाममा धेरै जमघट नगर्न र एकाघरका सदस्य मात्रै एक ठाउँमा बसेर दसैं मनाउन आग्रह गर्दै आएको छ ।

दसैंमा धेरै आवतजावत नगर्न र यस वर्ष जो जुन ठाउँमा छ त्यही बसेर दसैं मनाउन पनि नागरिकलाई आग्रह गरेको छ ।