लामो समयदेखि नेपालमा महिला अधिकारका क्षेत्रमा क्रियाशील अधिकारकर्मी एवं सञ्चारकर्मी वन्दना राणा महिलाविरुद्ध हुने भेदभाव अन्त्यसम्बन्धी संयुक्त राष्ट्रसंघीय समितिको सदस्यमा निर्वाचित भएकी छन् ।

राष्ट्रसंघीय उच्च पदमा नेपाली महिला पुगेको यो पहिलो अवसर हो । न्युयोर्कमा मंगलबार भएको निर्वाचनमा राणा विजयी भएकी हुन् ।

उनीसँगै विभिन्न देशका २६ जना महिला अधिकारकर्मीले प्रतिस्पर्धा गरेका थिए । राणाले १०६ मत पाएकी छन् । बढी मत पाएर विजयी भएका ११ मध्ये उनी ६ नम्बरमा पर्न सफल भएकी छन् ।

राणाले आगामी जनवरी १, २०१७ देखि २०२० सम्म उक्त समितिको सदस्य पदमा रहेर काम गर्नेछिन् । सरकारले गत मार्चमा राणाको नाम उक्त समिति सदस्यका लागि मनोनयन गरेको थियो ।

विगतमा सरकारले उक्त पदमा अर्की महिला अधिकारकर्मी सपना मल्ल प्रधानलाई मनोनयन गरे पनि उनले निर्वाचनमा विजय प्राप्त गर्न सकेकी थिइनन् ।

केही समयअघि मात्र नेपाल संयुक्त राष्ट्रसंघीय ७१ औं महासभाको उपाध्यक्षमा एक वर्षका लागि निर्वाचित भएको थियो । अधिकारकर्मी राणाले विगतमा नेपाल टेलिभिजनमा लामो समय समाचार वाचिकाका रूपमा काम गरेकी थिइन् । त्यस्तै गैरसरकारी संस्थामा रही महिला अधिकारका पक्षमा निरन्तर काम गर्दै आएकी छन् ।

प्रतिकृया दिनुहोस

सम्बन्धित समाचार