Ayodhi Prasad Yadav_new

काठमाडौं— संसदीय सुनुवाइ विशेष समितिले प्रमुख निर्वाचन आयुक्तका लागि प्रस्तावित डा.अयोधिप्रसाद यादवको नाम अनुमोदन गरेको छ । कार्यबाहक प्रमुख आयुक्त रहेका यादवको सुनुवाइपछि समितिका सभापति कुलबहादुर गुरुङको अध्यक्षतामा शुक्रवार बसेको बैठकले सर्वसम्मतिले अनुमोदन गरेको हो ।
सुनुवाइमा प्रस्तावित प्रमुख आयुक्त यादवले आगामी मंसिर महिनामा स्थानीय तहको निर्वाचनका लागि साउनभरिमा सम्पूर्ण पूर्वाधारको व्यवस्थाका साथै स्थानीय तह निर्वाचनसम्बन्धी ऐन पारित भए आयोग निर्वाचन गराउन तयार रहेको बताएका छन् ।
सधैंका लागि र सबैका लागि निर्वाचन आचारसंहिता बनाइसकिएकाले आगामी दिन कुनै पनि दलका कार्यकर्ताले आचारसंहिता उलंघन गरे कारवाहीमा पर्ने जानकारी दिँदै यादवले निर्वाचनका लागि आधारभूत शर्त पालना गराउन र राम्रो व्यवस्थापनका लागि पर्याप्त छलफल अघि बढाउनुपर्ने धारणा राखेका छन् ।
विद्युतीय मतदानका लागि छलफल भइरहेको, प्रवासी नेपालीको अनलाइन मतदानका काम अघि बढाइएको र सञ्चारमाध्यम पनि निर्वाचनका लागि सशक्त माध्यम भएकाले आगामी निर्वाचमा तिनको पनि साथ लिने यादवको भनाई छ ।
समितिका सदस्य चीनकाजी श्रेष्ठ, अष्टलक्ष्मी शाक्य, चित्रलेखा यादव, डा. प्रकाशशरण महत, आनन्दप्रसाद ढंगाना, गणेशमान गुरुङलगायतले यादवलाई प्रश्न गरेका थिए ।

प्रतिकृया दिनुहोस

सम्बन्धित समाचार

आज संविधान दिवस

/मङ्ल, अशोज ३, २०७४