Hearing Commetee

काठमाडौँ- व्यवस्थापिका–संसद्, संसदीय सुनुवाइ विशेष समितिले सरकारले विभिन्न मुलुक र नियोगमा राजदूतका लागि प्रस्ताव गरी सिफारिस गरेको परराष्ट्र सेवाका आठ जनाको नाम अनुमोदन गरेको छ । परराष्ट्र सेवाबाहेकबाट अघिल्लो सरकारले राजदूतमा प्रस्ताव गरी संसदीय सुनुवाइका लागि सिफारिस गरेर पठाएका १४ जनाको नाम पुष्पकममल दाहाल नेतृत्वको वर्तमान सरकारले फिर्ता लिएको छ ।

सरकारले राजनीतिक नियुक्तिका रुपमा राजदूतका लागि सिफारिस भएका १४ जनाको सिफारिस फिर्ता लिने निर्णय गरेकाले समितिले बहुमतका आधारमा संसदीय सुनुवाइ गर्नु नपर्ने निर्णय गरेको हो ।

समितिको शुक्रबार बसेको बैठकले संसदीय सुनुवाइका क्रममा उनीहरूले प्रस्तुत गरेको कार्ययोजना, अवधारणा र सोचका आधारमा योग्यता, क्षमता र अनुभवका दृष्टिकोणबाट योग्य ठहर्याएर राजदूतमा नियुक्ति गर्ने सरकारको प्रस्तावलाई सर्वसम्मतिबाट अनुमोदन गरेको हो ।

सरकारले सेवा अधिकारी लम्साल पाकिस्तान, ताराप्रसाद पोखरेल ब्राजिल, प्रकाशकुमार सुवेदी संयुक्त राष्ट्रसङ्घीय कार्यालय भियना, ऋषिराम घिमिरे रुसी महासङ्घ, रमेशप्रसाद खनाल जर्मनी, झवीन्द्रप्रसाद अर्याल इजिप्ट, डा दुर्गाबहादुर सुवेदी संयुक्त अधिराज्य र लोकबहादुर थापालाई बेल्जियम र युरोपेली सङ्घका राजदूतमा सिफारिस गरेको छ।

समितिबाट अनुमोदन भएका नाम सम्बन्धित मुलुकमा राजदूतमा सहमतिका लागि पठाइने र सहमति आएपछि सरकारको सिफारिसमा राष्ट्रपतिबाट उहाँहरुको नियुक्ति हुनेछ।

प्रधानमन्त्री केपी शर्मा ओलीको नेतृत्वमा रहेको सरकारले महेन्द्रबहादुर पाण्डे, डा खड्गबहादुर केसी, डा नारद भारद्वाज, डा शिवमाया तुम्बाहाङ्फे, अलिअख्तर मिकरानी, युवराज कार्की, युवनाथ लम्साल, प्रा डा महेन्द्रप्रसाद सिंह, पदम सुन्दास, लक्की शेर्पा, खगेन्द्र बस्न्यात, भरतबहादुर रायमाझी, निरञ्जनकुमार थापा र शर्मिला पराजुली ढकाललाई विभिन्न मुलुकका लागि राजदूतमा प्रस्ताव गरेको थियो।

राजदूत सिफारिस रद्ध गरिएकाहरु :

१. महेन्द्रबहादुर पाण्डे (चीन)
२. डा. खडगबहादुर केसी (जापान)
३. नारद भारद्वाज (श्रीलंका)
४. डा. शिवमाया तुम्बाहाम्फे (इजरायल)
५. अलिअख्तर मिकरानी (साउदी अबर)
६. युवराज कार्की (दक्षिण कोरिया)
७. लक्की शेर्पा (अष्ट्रेलिया)
८. महेन्द्रप्रसाद सिंह (कतार)
९. पदम सुन्दास (बहराइन)
१०. युगनाथ लम्साल (डेनमार्क)
११. निरन्जन थापा (रसिया)
१२. भरतबहादुर रायमाझी (युएई)
१३. खगेन्द्र बस्न्यात (बंगलादेश)
१४. शर्मिला पराजुली (ओमान)

यसअघि बैठकमा प्रस्तावित व्यक्तिको संसदीय सुनुवाइ प्रारम्भ भइसकेपछि संविधान र नियमले नमिल्ने गरी सिफारिस फिर्ता लिएको भनी प्रतिपक्ष सांसदले सरकारको आलोचना गरेका थिए। उनीहरूले सुनुवाइको चरणमा प्रवेश गरिसकेको अवस्थामा प्रस्तावित राजदूतको सिफारिस फिर्ता लिनु भनेको संसद्माथिकै ठूलो हस्तक्षेप हो, सुनुवाइ रोक्नु भन्ने सरकारको पत्र जायज होइन, त्यसैले यसलाई मान्यता दिनु हँदैन, सुनुवाइ अघि बढाउनु पर्ने बताएका थिए।

सत्तारुढ दल नेपाली काँग्रेस र नेकपा (माओवादी केन्द्र)का सांसदले भने सरकारको निर्णयको बचाउ गर्दै राजदूत नियुक्ति राजनीतिक नियुक्ति भएकाले सरकारले गरेको निर्णयमाथि टीकाटिप्पणी गर्न उचित नहुने तर्क प्रस्तुत गरे।

सिफारिस गर्ने निकायले निर्णय फिर्ता लिएपछि समितिले कसलाई सुनुवाइ गर्ने भनी प्रश्न गर्दै सांसदले जुन व्यक्तिलाई सुनुवाइ गर्नुपर्यो भनेर पत्र पठाइएका आधारमा कार्य प्रारम्भ भएको हो, उसैले रोक्न भनेपछि कसरी सुनुवाइ गर्ने भन्ने धारणा व्यक्त गरे।

बैठकमा निकै लामो बहस र रस्साकसीपछि बहुमतका आधारमा समितिले सुनुवाइ गर्नु नपर्ने निर्णय सुनाएको थियो ।

प्रतिकृया दिनुहोस

सम्बन्धित समाचार

सिमरामा बम विष्फोट

/सोम, मंसिर ४, २०७४