संविधान संसोधनपछि मात्र सरकार विस्तार

-- नेपाली टाइम्स अस्ट्रेलिया / प्रकाशित मिति : सोमवार, असार २६, २०७४

चितवन- उपप्रधान तथा परराष्ट्रमन्त्री कृष्णबहादुर महराले संविधान संशोधनपछि मात्र सरकार विस्तार हुने बताएका छन् । प्रेस सेन्टर नेपाल चितवनले आयोजना गरेको पत्रकार सम्मेलनमा उनले सरकारले संशोधनको प्रस्तावको तयारी गरिरहेको जानकारी दिएका छन् ।

‘संविधान संशोधनको प्रस्ताव आज भोलि नै पेश हुन्छ’ उनले भने, ‘मन्त्रालय भागबण्डामा खासै विवाद छैन।’

उनले भारतले लगाएको मालसामान तथा सेवा व्यवसाय कर (गुड्स एण्ड सर्भिस ट्याक्स) अर्थात् जिएसटीको नेपालमा पर्ने प्रभावका विषयमा अध्ययन गर्न छिट्टै एक टोली भारत जाने जानकारी पनि दिए ।

भर्खरै मात्र जिएसटी लागू गरेकाले त्यसको परिणाम आइनसकेको भन्दै उनले आफू केही समयअघि भारत जाँदा यस विषयमा त्यहाँका परराष्ट्रमन्त्रीसँग समेत कुराकानी गरेको उल्लेख गरे ।

भारतको केन्द्रीय सरकारले १ जुलाई २०१७ देखि राष्ट्रभर नयाँ तथा एकीकृत कर प्रणाली लागू गरेको छ। मालसामान तथा सेवा व्यवसाय कर (जिएसटी) नामाकरण गरिएको यस नयाँ र एकल कर प्रणाली राष्ट्रव्यापी रुपमा लागू गरिएपछि यसअघि विभिन्न राज्य तथा केन्द्रमा विद्यमान अलग अलग राज्यीय र संघीय कर व्यवस्था खारेजीमा परेको छ ।