एक भए साझा पार्टी र विवेकशील नेपाली दल

-- नेपाली टाइम्स अस्ट्रेलिया / प्रकाशित मिति : बुधबार, साउन ११, २०७४

काठमाडौं– साझा पार्टी र विवेकशील नेपाली दलबीच एकीकरण भई विवेकशील साझा पार्टीको घोषणा भएको छ । आज बुधवार काठमाडौंमा आयोजित एक कार्यक्रममा विवेकशील साझा पार्टीको घोषणा गरिएको हो ।
पार्टीको अधिवेशन नहोउञ्जेल सम्मका लागि सामूहिक नेतृत्व रहने उक्त पार्टीले जनाएको छ । ८ सदस्यीय संयोजन समितिको सह संयोजकमा उज्वल थापा र रविन्द्र मिश्र सहसंयोजक रहनेछन् । समितिका अन्य सदस्यमा गोविन्द नारायण, निरुपमा यादव, सूर्यराज आचार्य, अनुषा थापा, मुमाराम खनाल र रमेश पौडेल छन् ।
सामूहिक नेतृत्वमा गए पनि पार्टी बैठकको अध्यक्षता भने रविन्द्र मिश्रले गर्ने सहमति भएको छ । पार्टी घोषणासँगै ३४ जनाको केन्द्रीय समिति समेत घोषणा भएको छ । जसलाई महाधिवेशनसम्म ५९ सदस्यीय बनाइने उक्त पार्टीले जनाएको छ ।
नयाँ दलको लोगो र चुनाव चिन्ह तराजु रहनेछ ।