काठमाडौं– नेपालको संविधान दोस्रो संशोधन विधेयक ब्यवस्थापिका संसदले बहुमतले अस्वीकृत गरेको छ ।
संसदको सोमबारको बैठकमा निर्णयार्थ प्रस्तुत भएको उक्त विधेयकको पक्षमा ३ सय ४७ मत मात्र परेपछि सभामुख ओनसरी घर्तीले विधेयक बहुमतले अस्वीकृत गरेको घोषणा गर्नुभएको हो । विधेयक पारितका लागि संसदमा हाल कायम ५ सय ९२ सदस्य संख्या मध्ये ३ सय ९५ मत आवश्यक थियो ।
संसदको आजको बैठकमा उपस्थित ५ सय ५३ जना सांसद मध्ये २ सय ६ जनाले बिपक्षमा मतदान गरेका थिए । प्रमुख प्रतिपक्षी एमालेसहितको बिपक्षी गठबन्धन, राप्रपा लगायतका दलले विधेयकको बिपक्षमा मतदान गरेपछि संविधान संशोधन विधेयक पहिलो पटक संसदबाट असफल भएको हो ।
सत्तारुढ दल कांग्रेस, माओवादी केन्द्र, राजपा लगायत दलहरुले विधेयकको पक्षमा मतदान गरेपनि आवश्यक मत भने पुग्न सकेन । विधेयकको बिपक्षमा मतदान गर्न राप्रपाले आफ्ना सांसदलाई ह्विप जारी गरेको थियो ।
आगामी असोज २ गते २ नम्बर प्रदेशमा हुने स्थानीय तह निर्वाचनको वातावरण निर्माणका लागि भन्दै सरकारले संशोधन विधेयक संसदको आजको बैठकमा निर्णयार्थ प्रस्तुत गरेको थियो ।
गत चैतको अन्तिम साता संसद सचिवालयमा दर्ता गराएको संशोधन विधेयक पारित हुने अवस्था नआएपछि सरकारले चार महिनापछि मात्र संसदमा निर्णयार्थ प्रस्तुत गरेको हो ।

प्रतिकृया दिनुहोस

सम्बन्धित समाचार

घट्ने भयो आर्थिक वृद्धिदर

/मङ्ल, बैशाख ४, २०७५