कांग्रेस नेतृत्वमा अर्को गठबन्धन

-- नेपाली टाइम्स अस्ट्रेलिया / प्रकाशित मिति : बिहिबार, अशोज १९, २०७४

काठमाडौं– सत्तारूढ नेपाली कांग्रेससहित संसदमा प्रतिनिधित्व गर्ने ६ राजनीतिक दलले प्रदेश र केन्द्रको निर्वाचनमा तालमेल गर्ने सहमति गरेका छन् ।
बुधवार प्रधानमन्त्री निवास बालुवाटारमा बसेको ६ दलीय बैठकले लोकतन्त्रवादीहरूबीच कार्यगत एकता गरेर जाने सहमति भएको हो ।
गठबन्धनमा नेपाली कांग्रेस, राष्ट्रिय जनता पार्टी नेपाल, संघीय समाजवादी फोरम नेपाल, फोरम लोकतान्त्रिक, राष्ट्रिय प्रजातन्त्र पार्टी र राष्ट्रिय प्रजातन्त्र पार्टी प्रजातान्त्रिक आबद्ध छन् ।
प्रधानमन्त्री निवास बालुवाटारमा बुधबार साँझ बसेको नेपाली कांग्रेस, राष्ट्रिय जनता पार्टी नेपाल, संघीय समाजवादी फोरम नेपाल, फोरम लोकतान्त्रिक, राष्ट्रिय प्रजातन्त्र पार्टी र राष्ट्रिय प्रजातन्त्र पार्टी प्रजातान्त्रिकको बैठकले प्रजातान्त्रिक शक्तिहरूबीच चुनावी तालमेल गरेर जान सात सदस्यीय कार्यदल गठन गरेका छन् ।
कांग्रेसबाट दुई र अन्य पाँच दलबाट एकएक सदस्य रहने गरी सात सदस्यीय कार्यदल गठन गरिएको हो । दलहरूले बिहीबार नै कार्यदलमा रहने नेताहरूको नाम टुंगो लगाउँदै निर्वाचन तालमेलसहितका विषयमा काम सुरु गर्ने भएका छन् ।