वाम गठबन्धनद्वारा घोषणा पत्र सार्वजनिक

-- नेपाली टाइम्स अस्ट्रेलिया / प्रकाशित मिति : मङ्लबार, कार्तिक २१, २०७४

काठमाडौं– वाम गठबन्धनले आसन्न प्रतिनिधिसभा तथा प्रदेशसभा निर्वाचनका लागि तयार पारेको घोषणापत्र मंगलबार सार्वजनिक गरेको छ।
काठमाडौंको तीनकुनेस्थित रोयल ब्याङक्वेटमा आयोजित विशेष कार्यक्रमकाबीच घोषणापत्र सार्वजनिक गरिएको हो । कार्यक्रममा गठबन्धनको मुख्य घटक नेकपा एमालेका अध्यक्ष केपीशर्मा ओली, नेकपा माओवादी केन्द्रका अध्यक्ष पुष्पकमल दाहाल प्रचण्डलगायत सहभागी थिए ।
कार्यक्रममा माओवादी केन्द्रका अध्यक्ष पुष्पकमल दाहालले वाम गठबन्धनको मुख्य ध्यान मुलुकको स्थिरता र समृद्धिमा भएको बताए । देशमा स्थिरता र समृद्धिका लागि बलियो र एउटै कम्युनिष्ट केन्द्र बनाई अस्थिरताको अन्त्य गर्ने आफूहरुको लक्ष्य रहेको दाबी उनले गरे ।
नेकपा एमालेका अध्यक्ष केपी शर्मा ओलीले वाम गठबन्धनको चुनावको घोषणापत्र राष्ट्र निर्माणको प्रतिबद्धता भएको बताए ।
गठनबन्धनको चुनावी घोषणापत्र सार्वजनिक गर्दै अध्यक्ष ओलीले घोषणापत्रले राष्ट्रियता, लोकतन्त्र, राष्ट्रिय एकता, शान्ति, स्थायित्व र विकासबारे सुनिश्चिता गरेको दाबी गरे । ‘यो चुनावको घोषणापत्र होइन, राष्ट्र निर्माणको प्रतिबद्धता हो । गरिबी निवारण, रोजगारी, स्वच्छ वातावरण र दिगो विकासका लक्ष्यपूर्तिका लागि हामीले प्रत्याभूति गरेका छौँ, उनले भने ।