आउँदैछ गोरिल्ला ग्लास–६

-- नेपाली टाईम्स अष्ट्रेलिया ?>

अमेरिकी टेक्नोलोजी कम्पनी कर्निङले आफ्नो गोरिल्ला ग्लासको नयाँ भर्सन कर्निङ गोरिल्ला ग्लास–६ ल्याउने घोषणा गरेको छ । यो हालसम्मकै सर्वाधिक बलियो स्क्रिन प्रोटेक्सन ग्लास हुने दावी गरिएको छ । उक्त ग्लास प्रयोग गरिएको स्मार्टफोनलाई १ मिटर अर्थात् करिव ३९ इन्च माथिबाट १५ पटक खसाल्दा पनि स्क्रिन नफुट्ने दावी गरिएको छ । यो हाल प्रचलित गोरिल्ला ग्लास–५ को तुलनामा दोब्बर सुरक्षित भएको बताइएको छ । स्मार्टफोन खस्दा यसलाई फुट्नबाट बचाउन प्रयोग गरिएको ग्लास अर्थात् सिसालाई गोरिल्ला ग्लास भनिन्छ । साधारण भाषामा यसलाई डिस्प्लेको माथि राखिएको सिसा भन्न सकिन्छ । एप्पल, सामसुङ, एलजी अथवा अन्य कम्पनीले आफ्ना स्मार्टफोनलाई कोर्निङ गोरिल्ला ग्लासले सुरक्षित बनाएका हुन्छन् । आगामी बर्ष अर्थात २०१९ मा बजारमा आउने स्मार्टफोनमा गोरिल्ला ग्लास–६ प्रयोग हुने अनुमान गरिएको छ ।