काठमाडौं— गत अप्रिल २५ को ७.६ रेक्टर स्केलको शक्तिशाली भूकम्प (गोरखाको बारपाक) पछि निरन्तर परकम्प जाने क्रम आजका मितिसम्म जारी छ । राष्ट्रिय भूकम्प मापन केन्द्रले जनाए अनुसार नेपालमा हालसम्म ४ रेक्टर स्केलभन्दा माथिका ४ सय ४५ परकम्प गएका छन् । यसैबीच केन्द्रले अहिले पनि हरेक दिन ४ रेक्टर मुनिका ४० वटासम्म भूकम्प गइरहेको छ ।
अप्रिल २५ को भूकम्पअघि पनि नेपालमा दिनहुँ ४ रेक्टरभन्दा कम स्केलका १२ देखि १५ वटा भूकम्प गइरहन्थे । यद्यपि ती भूकम्पको रेकर्ड राखिन्नथ्यो । ठूलो भूकम्पपछि परकम्प आउने क्रम जारी रहेको र अहिले पनि दैनिक ३० देखि ४० वटासम्म भूकम्प गइरहेको केन्द्रका प्रमुख लोकविजय अधिकारीले बताएका छन् ।
‘अप्रिल २५ को ७.६ रेक्टरको भूकम्पपछि हालसम्म गइरहेका परकम्प भनि पनि भूकम्प नै हो, केन्द्रका प्रमुख अधिकारीका अनुसार गोरखा भूकम्पपछि प्रारम्भको एक महिनासम्म एक दिनमै ४ रेक्टर स्केलभन्दा मुनिका एक हजार ३०० सम्म भूकम्प परकम्प गएका थिए भने लामो समयसम्म दैनिक ५०० वटा भूकम्प गएका थिए । पछिल्लो समय परकम्प कम हुँदै गएको छ । ठूलो भूकम्प गएपछिको अवस्थामा लामो समयसम्म परकम्प नगएमा ठूलो भूकम्प जाने खतरा भएकाले परकम्प समय समयमा गएकै राम्रो हुने विज्ञहरु बताउँछन् । केन्द्रको विवरणअनुसार अप्रिल २५ को भूकम्पअघिका वर्षहरुमा ४ रेक्टर स्केलभन्दा माथिका वार्षिक २५ देखि ६० वटा भूकम्प गएका थिए ।
यसैबीच सोमबार बिहान ९ बजेर ४० मिनेट जाँदा पनि बाजुरा केन्द्रविन्दु भएर ४.३ रेक्टर स्केलको भूकम्प गएको केन्द्रले जनाएको राससले जनाएको छ ।