काठमाडौं– नेपाल वायु सेवा निगमको एयरबस-३३० विमान खरिद प्रक्रिया त्रुटीपूर्ण रहेको सांसदहरूले बताएका छन् । नेपाल वायु सेवा निगमले खरिद गरेको एयरबस-३३० विमान खरिदका विषयमा महालेखापरीक्षकको प्रतिवेदनले प्रश्‍न उठाएपछि प्रतिनिधि सभाको सार्वजनिक लेखा समितिले छानविन थालेको हो ।
समितिको बैठकमा बोल्ने अधिकांश सांसदहरूले विमान खरिद गर्दा भ्रष्‍टाचार भएको दाबी गरेका थिए । समितिका सभापति भरत शाहले वाइड बडी विमान खरिद प्रक्रिया छानविन गरी सत्यतथ्य सार्वजनिक गरिने बताए । बैठकमा नेकपाका सांसद हृदयेश त्रिपाठीले निगम व्यवस्थापनका कारण विमान खरिद प्रक्रिया विवादित भएको बताए ।
समितिले यस विषयमा छानविन गरी दोषीलाई कारवाही नगरिए नागरिक लगानी कोष र सञ्‍चय कोषले निगममा गरेको कर्जा लगानी जोखिममा पर्ने उनले दाबी गरे । निगमले नागरिक लगानी कोष र सञ्‍चय कोषबाट रु। २५ अर्ब कर्जा लिएर विमान खरिद गरेको थियो । कांग्रेस सांसद मीनेन्द्र रिजालले विमान खरिदका विषयको स्वामित्वमा प्रश्‍न उठ्दा सरकारले स्पष्‍ट जवाफ दिन नसकेकाले अनियमितताको शंका उत्पन्‍न भएको बताए ।
सांसदहरू सूर्य पाठक, अमनलाल मोदी, राजेन्द्रकुमार केसी, प्रेम आले, विरोध खतिवडा, लेखराज भट्टलगायतले निगमले सीधै एयरबस कम्पनीबाट नभई मध्यस्थकर्ता कम्पनीबाट खरिद गरेकाले अनियमितताको आशंका भएको बताए ।

निगमका महाप्रबन्धक सुगतरत्‍न कंसाकारले सार्वजनिक खरिद ऐन र निगमको खरिद नियमावलीअनुसार नै विमान खरिद गरेकाले भ्रष्‍टाचार नभएको दाबी गरे । समितिलाई छानविनका लागि आग्रह गर्दै सहयोग गर्न तयार रहेको उनले बताए ।

सत्तारुढ दलका सांसद प्रेम आलेले विमान खरिद प्रक्रियामा संलग्‍नलाई महालेखापरीक्षकको प्रतिवेदनअनुसार कारवाही हुनुपर्ने माग गरे । त्रिपाठीलगायत सांसदले उपसमिति बनाएर छानविन गर्नुपर्ने माग गरे पनि रिजाल, खतिवडालगायतले समितिमै थप छलफल आवश्यक भएको बताउँदै तत्काल उपसमिति बनाउन नहुने धारणा राखेका थिए।