महेन्द्रनगर- प्रहरी महानिरीक्षक सर्वेन्द्र खनालले निर्मला पन्तका हत्यारा जो कोही भए पनि नछोड्ने पुरानै आश्वासन दोहोर्याएका छन् । आज आईतवार जिल्ला प्रहरी कार्यालय कञ्चनपुरमा सञ्चारकर्मीहरुसंग कुराकानी गर्दै आईजीपी खनाल पहिलेकै आश्वासन दोहोर्याएका हुन् ।

घटनाको अनुसन्धान जारी रहेको बताउँदै आईजीपी खनालले निर्दोष नफस्ने र दोषी जो कोही भएपनि नछाडिने धारणा व्यत्तः गरेका हुन् । अनुसन्धानमा प्रहरी कसैको दबाब र प्रभाव नभएको खनालको भनाइ छ ।
शंकाको घेरामा आएका साना ठूला सबैलाई अनुसन्धानको दायरामा ल्याइने खनालको अडान रह्यो
आईजीपी खनाल निर्मला हत्याकाण्ड पछि दोस्रो पटक कञ्चनपुर आएका हुन् । उनले समुदाय–प्रहरी साझेदारी कार्यक्रम, प्रहरी एकाइको वस्तुस्थिति लगायतका विषयमा पनि जानकारी लिएका छन् ।

आईजीपी खनाल अहिले प्रदेश ५, कर्णाली प्रदेश र सुदूरपश्चिम प्रदेशको नियमित अनुगमन भ्रमणमा छन् । निर्मला पन्तको बलात्कारपछि हत्या भएको पाँच महिना भन्दा बढि समय भैसक्दा पनि हत्याराको पहिचान गर्न नसकेको भन्दै प्रहरीको चौतर्फी आलोचना भइरहेका बेला अनुसन्धानमा आइजीपी आफै सक्रिय भएका छन् ।