काठमाडौँ- काठमाडौँ उपत्यकासहित देशका अधिकांश भागमा हावाहुरी चल्न सुरु भएको छ । बंगालको खाडीबाट सुरु भएको चक्रवात फानीको प्रभावले काठमाडौँ उपत्यकासहित आसपासका क्षेत्रमा पनि हावाहुरी चल्न सुरु भएको हो ।

हावाहुरीका कारण काठमाडौँको सडकमा सवारीका साधनहरु पातलीएका छन् । मानिसहरुलाई घरबाहिर निस्कन समस्या भएको छ ।

जल तथा मौसम पूर्वानुमान महाशाखाले नेपालको पूर्वी तथा मध्य क्षेत्रमा आज (शुक्रबार) र भोलि (शनिबार) पनि चक्रवातको प्रभाव रहने जनाएको छ ।

मौसमविद विभूति पोखरेलले चक्रवातको प्रभावका कारण हुरिबतास चल्ने र मेघ गर्जनसहित पानी पर्ने सम्भावना रहेको बताइन् ।

उनले हिमाली भेगमा भारी हिमपात हुने बताइन् । भारी हिमपात हुने भएकोले हिमाली भेगमा गएका पर्वतारोहीलाई सुरक्षित स्थानमा रहन र दुई दिन हिमाली क्षेत्रमा हेलिकप्टर नउडाउन सरकारले अनुरोध गरेको छ।

यसअघि मौसम विभागले चक्रवात ‘फानी’का कारण नेपालको मौसम परिवर्तन भइ मेघ गर्जन र चट्याङ तथा हावाहुरीसहित वर्षा हुने जनाएको थियो ।

हिमाली क्षेत्रमा भारी हिमपातको सम्भावना देखिएकाले त्यहाँका बासिन्दा तथा पर्यटकलाई सुरक्षित स्थानमा रहन महाशाखाले आग्रह गरेको छ । चक्रवात ‘फानी’ हाल बङ्गालको खाडी तथा भारतको ओडिसा तटीय क्षेत्र नजिकै देखिएको छ ।

आजदेखि यो मौसम प्रणाली ओड़ीसाको तटीय क्षेत्रमा मध्याह्नतिर भित्रिने सम्भावना देखिएको र उत्तर–पूर्व दिशातर्फ जाने क्रममा कमजोर बन्दै जाने महाशाखाले जनाएको छ । देशको पश्चिमी क्षेत्रमा आज पश्चिमी वायुको प्रभाव रहने हुँदा केही स्थानमा हल्कादेखि मध्यम वर्षाको सम्भावना देखिन्छ । हिमाली भू–भागमा पनि हिमपातको सम्भावना रहेको छ । आइतबारदेखि देशभर मौसममा क्रमिकरुपमा सुधार आउने सम्भावना छ ।