आज ३ अप्रिल शुक्रबारका दिन आफ्नो नियमित पत्रकारहरु संगको भेटघाटमा अष्ट्रेलियाका प्रधानमन्त्रि स्कट मोरिशनले विद्यार्थी र भिजिटर भिषामा रहेका मानिसहरुका बारेमा मुख खोलेका छन् । प्रधानमन्त्रीले अपरान्ह १.४० मा पर्लियामेन्ट हाउस स्थित प्रधानमन्त्री कार्यालयको प्रांगणमा आयोजित पत्रकार भेटघाटमा उपस्थित पत्रकारहरु ले सोधेको प्रश्नको जवाफ दिदै विद्यार्थी र पर्यटकहरु लाई प्रदान गर्ने सहयोगका बारेमा सरकारको धराणा स्पष्ट पारेका हुन् ।

“यो संकटको घडीमा यदि कोहि टुरिष्ट अष्ट्रेलियामा छन् भने उंहाहरु आफ्नो देश फर्कने तर्फ सोच्नु उचित हुनेछ”, उनले भने । सबै राहत तथा उद्धारका उपायहरु अष्ट्रेलिया र अष्ट्रेलियनहरुका लागि अपनाइएको हो । त्यसै गरि इन्टरनेशनल स्टुडेन्टहरुका सवालमा पनि उनले सरकारको धारणा प्रष्ट पारे । “एक बर्षको लागि सम्पूर्ण खर्चको व्यवस्था गर्नु बिधार्थी भिषाको मापदण्ड अन्तर्गत पर्दछ र यो अब्यबहारिक छैन” भन्दै यस बारेमा इमिग्रेशन मिनिष्टरले केहि दिन भित्र आफ्नो योजना राख्ने संकेत दिए ।

अष्ट्रेलिया सरकारले करिब ३०० बिलियन डलर भन्दा बढीको राहत तथा सहयोग प्याकेज घोषणा गरिसकेको छ । उक्त सहयोग प्याकेजमा लक्डाउनको मारमा परि बेरोजगार बनेका विद्यार्थीहरु लाई पनि समेट्नु पर्छ भन्दै अष्ट्रेलिया स्थित नेपाली संघहरुको फेडेरेसन “फेन्का”, माइग्रेशन एजेन्टहरुको एलाइन्स “एका” ले सरकारलाई ज्ञापनपत्र बुझाएको थियो ।

यता एनआरएनए अष्ट्रेलियाले सुरुका दिनदेखि नै आफ्नो सबै संजाललाई विद्यार्थीहरुको सहयोगमा जुट्न परिचालन गरेको छ । बिधार्थी कल्याणकारी कोषमा जम्मा भएको रकम समेत कोरोनभाइरस् संक्रिमित र आइसोलेशनमा रहेका विद्यार्थीहरुको सहयोगमा खर्च गरेको बुझिएको छ ।

प्रधानमन्त्रीको आजको भनाइले नेपाली विद्यार्थीहरुको सहयोगमा एनआरएनए, नेपाली दूताबास, महाबाणिज्य दुतहरु लगाएत सम्पूर्ण नेपाली सामुदायिक संघ संस्थाहरु माथि अरु जिम्मेवारी थपिएको प्रष्ट भएको छ ।