छन्द नै खास होस्

-- उत्तम विचार ?>

छन्दनै राग हो छन्द नै सिर्जना
छन्द भो स्वादिलो छन्द नै तिर्सना ।
छन्दका रागमा डुब्नु पो जिन्दगी
छन्दले पूर्ण यो जिन्दगी बन्छ कि ।।१।

छन्द मात्रा यही छन्द नै हो गण
छन्द हो फूल यो छन्दमै अर्पण ।
छन्द यात्रा यही छन्द हो सारथि
छन्दमै देख्छु यो काव्यको उन्नति ।।२।।

छन्दकै प्यास होस् छन्दकै भोक होस्
छन्दमा रास्ट्र होस् छन्दमै लोक होस् ।
छन्द बस्ती बनोस् छन्दमै गाउँ होस्
सिर्जना काव्यमा छन्दकै नाउँ होस् ।।३।

छन्द माटो यही छन्द नै हो मल
छन्द उर्जा तथा छन्द नै सामल ।
छन्द नै उब्जनी छन्द हो धान यो
छन्द नै ज्ञान हो छन्द बिज्ञान हो ।।४।।

छन्द होस् लेखनी सिर्जना छन्द होस्
छन्द नै प्राण होस् साधना छन्द होस् ।
छन्द धर्ती बनोस् छन्द आकाश होस्
छन्द नै सम्पदा छन्द नै खास होस् ।५।।


छन्द दिवसकाे उपलक्ष्यमा प्रकाशित  छन्द कविता  : स्रविग्णी छन्द