काठमाडौं– कोरोना भाइरसको संक्रमणसंगै लागू भएको लकडाउनका कारण बन्द भएका विभिन्न मुलुकका उद्योग, व्यवसाय सुचारु भएसँगै नेपाली कामदारको माग आउन थालेको व्यवसायीहरूले बताउन थालेका छन् ।

रोजगारीको गन्तव्य मलेसियालगायत खाडीका मुलुकबाट नेपाली कामदारको माग आउन थालेको वैदेशिक रोजगार व्यवसायी सङ्घका अध्यक्ष विष्णुप्रसाद गैरे बताएका छन् ।

मापदण्ड बनाएर कामदार रोजगारीका लागि विदेश पठाउने वातावरण सरकारले बनाउन जरुरी रहेको अध्यक्ष गैरेको भनाइ छ ।

लकडाउनभन्दा पहिला भिसा लागेर रोजगारीमा जान रोकिएका कामदारको सङ्ख्या एक लाखभन्दा बढी रहेको छ ।

यसै गरी एक लाख २८ हजारको हाराहारीमा पूर्वश्रमस्वीकृति ल्याइएको सङ्ख्या छ ।

सरकारले मापदण्ड बनाएर वैदेशिक रोजगारीमा कामदार पढाउन श्रम मन्त्रालय लगायत सरोकारवाला निकायसँग छलफल गरिरहेको बताइन्छ ।

सरकारले केही दिनअघि मात्रै वैदेशिक रोजगारीमा जाने कामदारका लागि श्रम स्वीकृति प्रदान गर्ने निर्णय गरिसकेको छ ।

सरकारले हिजोको जस्तै गरेर आजको अवस्थामा जस्तो पायो त्यस्तो मुलुकमा कामदार पठाउन व्यवसायीलाई दिन नहुने वैदेशिक रोजगारका जानकारको भनाइ छ ।

श्रम मन्त्रालयले एउटा मापदण्ड बनाएर कामदार पठाउने वातारण बनाउन सके देश र कामदारको लागि फाइदा हुने वैदेशिक रोजगार विज्ञ मधुविलास पण्डित बताउनुहुन्छ ।

गैरआवासीय नेपाली सङ्घ ९एनआरएनए० मध्यपूर्वका उप–संयोजक राजेन्द्र अर्याल खाडीमा अर्थतन्त्र धराशायी भएको अवस्था रहेको बताउनुहुन्छ । कम्पनीको अवस्थाको अध्ययन नगरी कामदार पठाउन हतार गर्नु दुर्घटना निमत्याउनु भएको उप–संयोजक अर्याल बताउनुहुन्छ ।

वैदेशिक रोजगार विभागका महानिर्देशक कुमारप्रसाद दाहाल नीतिगत रुपमा श्रम स्वीकृति दिने एउटा कुरा भए पनि सम्बधित मुलुकको रोजगारदाताले कामदार लैजान्छन् वा लैजानन् उनीहरूको निर्भरताको कुरा भएको बताउनुहुन्छ ।

श्रम स्वीकृति खुले पनि पहिलाको जस्तो धेरै कामदार जाने स्थिति तत्काल नरहेको महानिर्देशक दाहाल बताउनु हुन्छ ।