अष्ट्रेलियाबाट संचालन भएको ‘हल अफ फेम’ पहिलो सिजनको सफलता संगै दोश्रो सिजन सुरु हुने र यसका लागि सम्पूर्ण तयारीका साथ आयोजक अगाडी बढिरहेको आयोजक एमएनटिभीले जनाएको छ। अहिलेको बिश्व कोरोना महामारीले आक्रान्त बनेको विषम परिस्थितिमा संगीतका माध्यमले मनोरंजन सहित सकारात्मक सन्देश दिने उदेश्यले आयोजना गर्न लागिएको यो दोश्रो सिजन अनलाइन माध्यमबाट हुनेछ। जसमा सहभागी हुन चाहनेले आफ्नो प्रस्तुति सहितको भिडियो पठाउनु पर्नेछ। भिडियोमा गायन प्रस्तुति तीन देखि पाँच मिनेट सम्मको हुनुपर्नेछ।

प्राय: गायन प्रतियोगितामा प्रतियोगीको उमेर हद तोकिएको हुन्छ । तर यस गायन प्रतियोगितामा प्रतियोगीको लागि उमेर हद राखिएको छैन । यसअर्थमा पनि नेपाल र नेपाल बाहिर रहेका तथा नेपाल गीत संगीत प्रति रुचि भएका प्रतिभाशाली व्यक्तिहरुलाई यस प्रतियोगिता एउटा राम्रो अवसर हुनसक्ने आयोजक संस्था एमएनटिभीले जनाएको छ।
प्रतियोगिताको निर्णायक मण्डलमा वरिष्ठ गायक दीप श्रेष्ठ, कन्दरा व्याण्डका गायक विवेक श्रेष्ठ र गायिका रजिना रिमाल रहनेछन्। त्यस्तै, मिस ओसेनिया नेपाल २०२० जेमिना श्रेष्ठ कार्यक्रम संचालकको रुपमा रहनेछिन्। प्रतियोगिताका विजेतालाई एक लाख नगदसहित गीत रेकर्ड, म्युजिक भिडियो निर्माण, फोटो शूट लगायतको पाँच लाख रुपैयाँ मूल्य बराबरको प्याकेज प्रदान गरिने आयोजक संस्थाले जनाएको छ । यो प्रतियोगिता अन्तर्राष्ट्रिय अनलाइन प्रतियोगिता भएको हुनाले जुनसुकै देशमा रहेका नेपालीले पनि आवेदन दिन सक्नेछन्। आवेदन दिने समयावधि नोभेम्बर १५ सम्म रहेको छ। प्रतियोगिताको लागि आवेदन दिने बारेमा विस्तृत जानकारी तलको किल्प हेर्न अनुरोध गरिएको छ :https://youtu.be/gHGCnRzTB6k