काठमाडौं– विपक्षी दलहरुको गठबन्धनले संसद विघटनविरुद्ध सर्वोच्च अदालतमा सोमबार रिट दायर गर्ने भएका छन् ।

गठबन्धनले प्रतिनिधि सभा विघटनविरूद्ध सर्वोच्चमा रिट दिन लागेका हुन् ।

आजै रिट दिने तयारी गरे पनि सांसदहरूको हस्ताक्षर संकलन भइनसकेका कारण भोलि विहान १० देखि ११ बजे भित्रमा रिट दायर गर्न लागिएको हो ।

नेकपा एमालेका नेता माधवकुमार नेपाल पक्षका सांसदको हस्ताक्षर बाँकी रहेको बताइएको छ ।

नेपाल पक्षका १८ जना नागरिकता लिएर पुगेका भएपनि उनीहरुले हस्ताक्षर गर्न आनाकानी गरेका कारण आज रिट दायर गर्न नसकिएको एक नेताले बताए ।

पाँच राजनीतिक दलहरूले नेपाली कांग्रेसका सभापति शेरबहादुर देउवालाई प्रधानमन्त्री नियुक्ति गर्न परमादेश माग गर्दै सर्वोच्च अदालतमा रिट दर्ता गर्ने भएका x’न् ।

आइतबार दिउँसो सिंहदरबारस्थित नेपाली कांग्रेस संसदीय दलको कार्यालयमा कानुन व्यवसायीहरूसँग छलफल गरेपछि विपक्षी दलहरू यो निर्णयमा पुगेका हुन् ।

रिटमा धारा ७६ (५) अनुसार प्रधानमन्त्री नियुक्तिका लागि नेपाली कांग्रेसका सभापति शेरबहादुर देउवाले १४९ सांसदको हस्ताक्षरसहित गरेको दावी वैधानिक रहेको दावी गरिएको छ ।

अहिलेसम्म कांग्रेसका ६१ र माओवादीका ४९ सांसदको हस्ताक्षर भइसकेको छ ।

हस्ताक्षर गर्नेक्रम जारी छ ।

सबै सांसदको नागरिकता, सांसद परिचयपत्र र हस्ताक्षरको नमूना संकलनको काम सकिएको छ ।