काठमाडौं– अन्तर्राष्ट्रिय नेपाली कलाकार समाज (इनास) को चौथो महाधिवेशनबाट ग्लोबल अध्यक्षमा पुष्प बरुवाल सर्वसम्मत पुनः निर्वाचित भएका छन् ।

काठमाडौंमा सम्पन्न भएको महाधिवेशनले नयाँ कार्यसमितिसँगै महादेशीय (क्षेत्रीय), राष्ट्रिय र राज्य समितिका संयोजक र सहसंयोजक र पदाधिकारीहरूलाई नयाँ कार्यकालका लागि जिम्मेवारी दिएको हो ।

महाधिवेशनमा नयाँ कार्यसमिति चयनसँगै नेपाली फिल्ममा योगदान पुर्‍याउने कलाकारहरू शिव श्रेष्ठ, भुवन केसी, सरोज खनाल, गौरी मल्ल, करिश्मा मानन्धर र संगीतकार शम्भुजीत बासकोटालाई इनास विशिष्ट कलाकारिता सम्मानद्वारा सम्मान गरियो ।

सोही अवसरमा इनासद्वारा आयोजित दोस्रो अनलाइन नृत्य एवम् गायन प्रतियोगिताका विजयीलाई नगद क्रमशः एक लाख, ५० हजार, २५ हजार र ट्रफीसहित पुरस्कृत गरियो ।

नेपाली कला, सस्कृति, भाषा, साहित्यको उत्थान र प्रवर्धनका साथै नेपाली फिल्मको विश्वव्यापी बजार विस्तारमा क्रियाशील इनासले नेपालमा परेको विपतिमा गरेका विभिन्न सामाजिक कार्यहरूको भिडियोसमेत प्रस्तुत गरिएको कार्यक्रममा चलचित्र विकास बोर्डका अध्यक्ष दयाराम दाहाल , एनआरएनका अध्यक्ष कुमार पन्त, कलाकर्मी, सञ्चारकर्मीलगायतको उपस्थिति रहेको थियो ।