जीपीएसमा आधारित मोबाइल गेम पोकेमन गोले कीर्तिमान बनाएको छ । केही साताअघि मात्रै रिलिज भएको यो गेम अहिले सबैभन्दा चर्चित बनेको छ । स्टक बजारमा मोबाइल गेममध्येका थुप्रै रेकर्ड यसले तोडिसकेको छ । अमेरिकामा आईओएस डिभाइसमा खेलिने गेममध्ये पहिलो हुन यसलाई एक दिन मात्र लाग्यो । एन्ड्रोइडमा यो चार दिनमा एक नम्बरमा पुग्यो । सबैभन्दा बढी डाउनलोड हुने मोबाइल गेमको रेकर्ड पनि यसले तोड्ने अनुमान गरिएको छ । यो अहिले ३३ देशमा आधिकारिक रूपमा रिलिज भएको छ । यो गेम खेल्न पहिला आफ्नो पोकेमन अकाउन्टमा आफ्नो अवतार बनाउनु पर्छ । त्यसपछि मोबाइलको जीपीएस अन गरेपछि त्यहाँ वरिपरिका ठाउँको नक्सा देखिन्छन् । ती ठाउँमा अन्य पोकेमनहरू लुकेर बसेका हुन्छन् । यो गेममा गरिने मुख्य काम भनेकै नयाँ ठाउँ पुग्दै त्यहाँ लुकेका पोकेमन समात्नु हो । जीपीएस अन गरी पोकेमनको एप खोलेर खोज्दै हिँड्दा आफू नजिकै कुनै पोकेमन भए नोटिफिकेसनका लागि मोबाइल भाइब्रेट हुन्छ । त्यसपछि त्यो जता छ, त्यतै गएर समात्नुपर्छ । पोकेमन गो खेल्न बाटोमा हिँड्दा दुर्घटना पनि हुन सक्छ । त्यसका लागि आफैँ सचेत हुनुपर्छ । यस्ता घटना भएका थुप्रै समाचार पनि आइरहेका छन् । न्युजिल्यान्डमा एक युवकले यो खेल खेल्न आफ्नो जागिर नै छोडेका छन् । जागिर छोडेर पोकेमन समात्न हिँडेका उनले कुल १ सय ५१ मध्ये ९० पोकेमन समाति सकेका छन् ।