राजनीतिक अस्थिरता, प्राकृतिक प्रकोप जस्ता कारणले सोचे अनुसार पर्यटन प्रबर्धन हुन नसकेको हालको नेपालको अवस्थालाई टेवा पुराउने र विदेश मै रहेका नेपालीहरु मार्फत नेपालको पर्यटकिय सुन्दरतालाई संसार भर पुराउने उदेश्यले नेपाल सरकार मातहातको नेपाल पर्यटन बोर्डले हालै बिश्वका बिभिन्न देशहरुमा मानार्थ प्रतिनिधि नियुक्ति गरेको छ । सोहि अनुरुप ठुलो पर्यटकिय बजार रहेको र नेपाललाई बिदा मनाउन इच्छुक अस्ट्रेलियनहरुको देशका तिन राज्यमा हालै नेपाल पर्यटन बोर्डले, बोर्डका मानार्थ प्रतिनिधि नियुक्ति गरेको छ । नेपाल टुरिजम बोर्डका कार्यकारी निर्देशक दीपकराज जोशीद्धारा हस्ताक्षर गरेर पठाइएको पत्रमा उनीहरुलाई बोर्डका अबैतानिक मानार्थ प्रतिनिधिमा नियुक्त गरिएको उल्लेख छ । यो नियुक्ति आगामी २ बर्षको लागि हुनेछ । जस अनुसार न्यु साउथ वेल्स राज्यको लागि बद्रि अर्याल, भिक्टोरियाका लागि चिरन्जिबी देबकोटा र क्वीन्स्ल्यान्डको लागि स्वतन्त्र प्रताप शाह नियुक्त भएका हुन् ।