काठमाडौं– भरतपुर महानगरपालिकाको १९ नम्बर वडामा पुनः मतदान गर्ने निर्वाचन आयोगको निर्णयविरुद्ध सर्वोच्च अदालतमा रिट दायर भएको छ । भरतपुर–१९ का एमालेबाट सदस्यका उमेदवार गुन्जमान विक र अधिवक्ता तुलसीराम पाण्डेले आज आइतबार रिट दर्ता गराएका हुन् ।
रिटमा भरतपुरको पुनःमतदान गराउने निर्वाचन आयोगको निर्णय बदर गरी च्यातिएका ९० मतपत्र बदर मानेर मतगणना कार्य सूचारु गर्न गराउन माग गरिएको छ । रिटमाथि सुनुवाईका लागि भोलि सोमबारका लागि पेशी तोकिएको छ ।
यसअघि निर्वाचन आयोगले भरतपुर महानगरपालिकाको १९ नम्बर वडामा पुनः मतदान गराउने निर्णय गरेको थियो । आयोगद्वारा जारी विज्ञप्तिमा महानगरपालिकाको वडा नं। १९ को मतदान केन्द्रको सम्पूर्ण मतपत्रहरु अवैध घोषित गरी मतदान रद्द गर्ने र मतदान रद्द गरिएका केन्द्रमा पुनः मतदान गराउने उल्लेख गरिएको थियो ।
भरतपुर महानगरपालिका वडा नं। १९ को मतगणना भइरहेकाबेला १४ जेठ राति विवाद हुँदा माओवादी केन्द्रका प्रतिनिधिले मतपत्र च्यातेपछि त्यहाँको मतगणना स्थगित भएको थियो ।
यता, एमाले अध्यक्ष केपी शर्मा ओलीले भरतपुरमा पुनः मतदान गर्ने निर्णय आफूहरुलाई मान्य नहुने चेतावनी दिएका छन् ।