काठमाडौं नेशनल मेडिकल कलेजको सम्बन्धन स्थगित

-- नेपाली टाइम्स अस्ट्रेलिया ?>

काठमाडौं– त्रिभूवन विश्वविद्यालयले काठमाडौं नेशनल मेडिकल कलेजलाई दिएको अस्थायी सम्बन्धन तत्कालका लागि स्थगित गरेको छ । त्रिविले प्रेस विज्ञप्ती जारी गरी काठमाडौं नेशनल कलेजलाई दिएको सम्बन्धन हाललाई स्थगित गरेको जनाएको छ । त्रिविले एक महिनाअघि काठमाडौं नेशनल कलेजलाई सम्बन्धन दिएको थियो ।
उक्त मेडिकल कलेजका सम्बन्धनका विषयमा टीकाटिप्पणी आएपछि छानविन समिति गठन गरेको त्रिविले जनाएको छ । स्वास्थ्य संस्था स्थापना, सञ्चालन तथा स्तरोन्नति मापदण्ड सम्बन्धी निर्देशिका, २०७० बमोजिम भएरनभएको सत्यतथ्य पत्ता लगाई प्रतिवेदन पेश गर्न समिति गठन गरिएको छ । सो समितिको प्रतिवेदन नआएसम्मका लागि अस्थायी सम्बन्धन स्थगित गरेको हो ।
त्रिविको विज्ञप्तीमा भनिएको छ– ‘सत्यतथ्य खोजबिन समितिको प्रतिवेदन प्राप्त नभएसम्म त्रि।वि। कार्यकारी परिषद्बाट मिति २०७४।४।१२ मा अस्थायी सम्बन्धन दिने भनी गरेको निर्णय हाललाई स्थगन गरिएको व्यहोरा समेत जानकारी गराइन्छ ।’