नेपाललाई त्रिकोणात्मक शृंखलाको उपाधि

-- नेपाली टाईम्स अष्ट्रेलिया / प्रकाशित मिति : शनिबार, बैशाख ११, २०७८

काठमाडौं- नेपालले काठमाडौंमा सम्पन्न त्रिकोणात्मक शृंखलाको उपाधि जितेको छ ।

कीर्तिपुर मैदानमा नेदरल्यान्ड्सलाई फाइनलमा १४२ रनले नेपालले उपाधि उचालेको थियो ।

नेपालले टी–२० अन्तर्राष्ट्रियमा हात पारेको यो सबैभन्दा ठूलो अन्तरको उपाधि समेत हो ।

यसअघि नेपालले २०१९ मंसिरमा भएको दक्षिण एसियाली खेलकुदमा भुटानमाथि १४१ रनको जित हात पारेको थियो ।

नेपालले घरेलु मैदानमा जितेको यो पहिलो त्रिकोणात्मक टी–२० शृंखला हो ।

सन् २०१० मा घरेलु मैदानमा आइसिसी विश्व क्रिकेट लिग डिभिजन–५ को उपाधि जितेपछि नेपालले जितेको यही नै पहिलो उपाधि हो ।

नेपालले सन् २०१९ पहिलो पटक युएईविरुद्धको तीन खेलको सिरिज २–१ ले जितेको थियो ।

शनिबार नेपालले दिएको २३९ रनको विशाल लक्ष्य पछ्याएको नेदल्यान्ड्स १७.२ ओभरमा ९६ रनमा अलआउट भयो ।

नेदरल्यान्ड्सका लागि म्याक्स ओ’डाउडले २० रन, कप्तान पिटर सीलारले १३ रन र सेबास्टियन ब्रातले नटआउट २६ रनमात्रै जोड्नसक्नुभयो ।

अन्य ब्याट्सम्यान दोहोरो अंकमा रन जोड्न नपाइ आउट हुनुभयो ।

बलिङमा नेपालका करण केसीले ३ विकेट लिनुभयो ।

यस्तै सन्दीप लामिछाने र कमलसिंह ऐरीले २–२ विकेट लिनुभयो । यस्तै अभिनास बोहराले १ विकेट हात पार्नुभयो ।

त्यसअघि टस हारेर पहिले ब्याटिङको निम्तो पाएको नेपालले निर्धारित २० ओभरमा ३ विकेट गुमाउँदै २३८ रन जोडेको थियो ।

यो नेपालको टी–२० अहिलेसम्मकै सर्वाधिक स्कोर हो । यसअघि भुटानविरुद्ध काठमाडौंमा भएको साग गेममा बनाएको २३६ रन नेपालको उच्च स्कोर थियो ।

नेपालका लागि ओपनर कुशल भुर्तेल र कुशल मल्लले अर्धशतकीय पारी खेल्नुभएको थियो । भुर्तेलले ५३ बलमा ७७ रन जोड्नेक्रममा ८ चौका र ३ छक्का प्रहार गर्नुभयो ।

जारी शृंखलामा कुशलको पहिलो चौथो अर्धशतक समेत हो ।

यसअघि उहाँले नेदरल्याण्ड्सका दुई तथा मलेसियासँगको एक खेलमा यसअघि उहाँले अर्धशतक हिर्कासकनुभएको थियो ।

नेपालका लागि उहाँ नेपालका लागि एकै सिरिजमा चार अर्धशतक प्रहार गर्ने पहिलो खेलाडीसमेत बन्नुभयो ।

यस्तै कुशल मल्लले आक्रमक ब्याटिङ गर्दै नटआउट ५० रन जोड्नुभयो ।

उहाँले २४ बलमा २ चौका र ५ छक्कासहित अर्धसतक पूरा गर्नुभयो ।

उपकप्तान दीपेन्द्रसिंह ऐरीले नटआउट ४८ रन जोड्नुभयो । उहाँले मात्र १८ बलमा ५ चौका र ३ छक्का प्रहार गर्दै नेपाललाई विशाल योगफलसम्म पुऱ्याए ।

नेपालका कप्तान ज्ञानेन्द मल्लले ३३ रन जोड्दा ओपनिङ ब्याट्सम्यान आशिफ शेखले १६ रनको योगदान दिनुभयो ।

ज्ञानेन्द्रले १९ बलमा ३ चौका र २ छक्का हिर्काउनुभयो । यस्तै नेपालका आशिफ सेखले ८ बलमा १ चौका र २ छक्का प्रहार गर्नुभएको थियो ।

प्रतियोगिताको सर्वोत्कृष्ट खेलाडी नेपालका कुशल भुर्तेल हुनुभयो । नेपाल क्रिकेट संघको आयोजनामा भएको प्रतियोगितामा नेपाल र नेदरल्याण्ड्ससँगै मलेसियाको सहभागिता थियो ।