फेसबुकलाई महामारीमै फाइदा

-- नेपाली टाईम्स अष्ट्रेलिया / प्रकाशित मिति : सोमवार, मंसिर २९, २०७७

कोरोना भाइरस महामारी विश्वका प्रविधि कम्पनीहरुका लागि निकै फापिरहेको बेला फेसबुकलाई पनि यो फलिफाप बनिरहेको छ । तथापि अनिश्चितता भने कायमै रहेको फेसबुकले जनाएको छ । विश्लेषकहरुको अनुमानलाई गलत सावित गर्दै तेश्रो त्रैमासिक अवधिमा फेसबुकले २१ अर्ब ४७ करोड डलर आम्दानी गर्न सफल भएको छ । फेसबुकको यो आम्दानी गत वर्षको तेश्रो त्रैमासिकको भन्दा २२ प्रतिशतले बढी हो । त्यसैगरी यस अवधिमा फेसबुकको खुद आय ७ अर्ब ८५ करोड भएको छ । कम्पनीले जारी गरेको तेश्रो त्रैमासिक रिपोर्टअनुसार फेसबुकका मासिक सक्रिय प्रयोगकर्ताको संख्या २ अर्ब ७४ करोड पुगेको छ । जुन अघिल्लो वर्षको भन्दा १२ प्रतिशत बढी हो । इन्स्टाग्राम, मेसेन्जर, ह्वाट्सएपलगायतका फेसबुकका विभिन्न एपहरुका कूल प्रयोगकर्ताको संख्या ३ अर्ब २१ करोड रहेको छ । यो अघिल्लो वर्षभन्दा १४ प्रतिशतले बढी हो ।