अधिकांश नेपाली चाडपर्वहरू रमाइला हुन्छन् । दसैं–तिहार जस्ता ठूला पर्वमा धेरै दिन वीदा पाइने हुनाले अधिकांश मानिसहरू यतिबेला रमाइलो गर्ने मुडमा हुन्छन् । स्वदेशमात्र होइन विदेशमा पनि दसै–तिहार जस्ता चाडपर्वमा नेपालीहरू रमाइलो शैलीमा मनाउँछन् । यी चाडपर्वमा तास खेलेर रमाइलो गर्नेहरू संख्या ठूलै हुन्छ । दसैंको तुलनामा तिहारमा तासको अझ ठूलो महत्व छ । धनकी देवी लक्ष्मीको पूजा गरिने तिहारमा वर्षभरी तास नछुने व्यक्तिसमेत तास खेल्न लालायीत हुन्छ । यसरी खेलिने कतिपय तासहरूमा ठूलै हार–जीत हुन्छ भने कतिपय तास रमाइलोका लागि खेलिन्छ । भरखरै गएको तिहारको अवसर पारेर द नेपाली टाइम्स अष्ट्रेलियाका नेपाल प्रतिनिधी कृष्ण भट्टराईले केही नेपाली सेलिब्रेटीहरूलाई तिहारमै तास खेल्ने कारण के होला भन्ने जिज्ञासा राखेका छन् ।

चेतन सापकोटा, संगीतकार

तिहारमा मात्र तास खेल्नु पर्छ भन्ने छैन । रमाइलोका लागि जहिले खेले पनि हुन्छ तर तिहारमा भने धार्मिक तथा सामाजिक रुपले समेत तास खेल्न छुट पाइने हुनाले यो पर्वमा तासको आफ्नै महत्व छ । म चाहिं पहिला रमाइलोका लागि भनेर तास खेल्न बस्छु अनि विस्तारै हार्दै गएपछि जित्न पाए हुन्थ्यो भन्ने लाग्छ ।

धिरज राई, गायक

नढाँटि भन्नु पर्दा मलाई तासका धेरै खेल खेल्नै आउँदैन, त्यसैले तिहारमा रमाइलोका लागि मात्र तास खेल्छु । तिहारमा सबैको मुड रमाइलो गर्ने हुनाले मानिसहरू रमाइलो गर्नैका लागि तिहारमा तास खेल्छन् जस्तो लाग्छ ।

नाजिर हुसैन, अभिनेता

चाडपर्वमा कुनै पनि प्रकारको तनाब नहुनाले अनि काम समेत नहुनाले रमाइलो गर्दै समय बिताउन तास खेलिन्छ जस्तो लाग्छ ।

दीपकराज गिरी, अभिनेता

चाडपर्वको मौसमलाई अझ रोमाञ्चक बनाउनका लागि नै तिहारमा तास खेलिएको होला ।

शुभेच्क्षा थापा, अभिनेत्री

तिहारमा चारैतिर झिलिमिलि हुन्छ, सबै खुसी हुन्छन् । त्यही खुसीको माहौललाई अझ बढि खुसी बनाउन तिहारमा तास खेलिएको हो कि ?

मञ्चिता केसी, अभिनेत्री

तिहारमा तास खेल्दा यदि जितियो भने वर्षभरी धन–सम्पत्तिको कमि हुँदैन भन्ने धार्मिक मान्यता छ । त्यही मान्यतामा आधारित भएर तिहारमा तास खेलिएको होला ।

कविता शर्मा, हास्य अभिनेत्री

तास खेल्ने भनेकै तिहारमा त हो नि । चाडवाडमा रमाइलोका लागि तास खेलिनु स्वभाविक हो ।