सिड्नीः २७ जनाको ज्यान जाने गरि नेपालको बारा र पर्सा जिल्लामा आएको हावाहुरी प्रभावितलाई राहत पु¥याउन अष्ट्रेलियामा सुरु भएको अभियानमा सहयोग आउने क्रम जारी छ । एसोसियन अफ नेपाल तराई अष्ट्रेलिया (एन्टा)को अगुवाईमा सुरु गरिएको अभियानमा पछिल्लो पटक चितवन समाज अष्ट्रेलियाले ५ सय र रेस्ट रियल स्टेट समूहले ५ सय ५५ अष्टे«लियन डलर सहयोग हस्तान्तरण गरेका हुन् । दुबै संस्थाका पदाधिकारीले एन्टाका अध्यक्ष अरुण कुमार ठाकुरलाई उक्त रकम हस्तान्तरण गरेका थिए ।

बिनाशकारी हावाहुरीमा ज्यान गुमाएका परिवार, घाइतेको उपचार, बालबालिकाको पठनपाठन र आवास निर्माणमा सघाऊ पु¥याउने उद्देश्यले घटनाको भोलीपल्टै देखि नै अभियान गरिएको एन्टाले जनाएको छ । ‘अहिलेसम्म करिब १२ हजार अष्ट्रेलियन डलर संकलन भइसकेको छ, संकलित रकम विभिन्न चरणमा नेपाल पठाउने काम पनि भइरहेको छ’, अध्यक्ष ठाकुरले भने । हावाहुरी प्रभावितलाई अष्ट्रेलियाका साथै विश्वका विभिन्न मुलुकबाट सहयोग आउने क्रम जारी रहे पनि पर्याप्त नभएको बताईएको छ । सरकारले पीडितहरुका लागि घर बनाउने घोषणा गरिसकेको छ ।