सिड्नीः गैरआवासीय नेपाली संघ (एनआरएनए) अष्ट्रेलियामा ३५ सयले नयाँ सदस्यता लिएका छन् । यससँगै एनआरएनए अष्ट्रेलियाको सदस्य सञ्जाल झण्डै १२ हजारको हाराहारीमा पुगेको छ । आगामी जुलाइमा महाधिवेशन हुने भएपछि विभिन्न पदका भावी नेतृत्वका आकाँक्षीहरुको सक्रियता र अनलाइन मार्फत सदस्यता लिन सक्ने सहज व्यवस्थाका कारण एक महिनाको अवधीमा ३ तीन हजार ५ सय ७४ सदस्यता थप भएको एनआरएनए अष्ट्रेलियाले जनाएको छ । सबैभन्दा बढी सिड्नी शहर समावेश न्यू साउथ वेल्स राज्यमा ४ हजार ७ सय ५२ र तास्मनियाँमा सबैभन्दा कम दुई सय ८ सदस्यता रहेका छन् ।

सन् २०१७–१९ मा ८ हजार २ सय ४४ सदस्य रहेको एनआरएनए अष्ट्रेलियामा सदस्यता सँख्या बढेसँगै १२ औँ महाविधेशन पनि प्रतिस्पर्धात्मक हुने अनुमान गरिएको छ । ‘यसपटक ३५ सय ७४ सदस्यता थपिएका छन्, यो निकै उत्साहजनक सँख्या हो’, एनआरएनएका उपाध्यक्ष नन्द गुरुङले भने । अब बस्ने कार्य समिति वैठकले महाधिवेशनको मिति र स्थान टुँगो लगाउनेछ । अहिलेसम्म भावी नेतृत्वका लागि कार्यसमिति उपाध्यक्ष एवम् न्यू साउथ वेल्स राज्यका संयोजक गुरुङ र कार्य समिति उपाध्यक्ष एवम् भिक्टोरिया राज्यका संयोजक केशब कँडेलले सामाजिक सञ्जाल मार्फत उम्मेद्वारी दिने घोषणा गरिसकेका छन् । यसअघि, निर्वाचनको तयारी स्वरुप एनआरएनएको १२ औँ केन्द्रीय वैठकले एनआरएनए अष्ट्रेलियाका संस्थापक अध्यक्ष मन केसीलाई निर्वाचन अधिकृत तोकी सकिएको छ ।