काठमाडौं— कप्तान ज्ञानेन्द्र मल्लको उत्कृष्ट प्रदर्शन तथा चौँथो विकेटका लागि दिपेन्द्र सिंह ऐरी र शरद भेषावकरले उत्कृष्ट साझेदारी गरेपछि बंगलादेशमा जारी इमर्जिङ टिम्स एशिया कप क्रिकेटमा नेपालले सान्त्वना जीत हासिल गरेको छ ।
नेपालले आफ्नो अन्तिम खेलमा हङकङलाई ७ विकेटले हराएको हो । हङकङले प्रस्तुत गरेको २ सय १५ रनको लक्ष्य नेपालले ३ विकेटको क्षतिमा ४४ दशमलव २ ओभरमा पुरा गर्‍यो । दिपेन्द्र र शरदले १ सय ५ रनको साझेदारी गरेर नेपालको जीत सुनिश्चित गरे । दीपेन्द्र ६० र शरद ५५ रनमा अविजित रहे ।
त्यसअघि ओपनर आसिफ शेख ११ औंँ ओभरमा ८ रनमा पविलियन फर्केपनि ज्ञानेन्द्रले नेपाली इनिङ्स उकासेका थिए । ८२ बल खेलेका उनले ७० रनको योगदान गरे । उनको इनिङ्समा ११ चौका समावेश थियो । त्यसअघि तेस्रो नम्बरमा ब्याटिङ गर्न आएका दिलिप नाथ १२ रनमा आउट भएका थिए । हङकङका जथा सुब्रमण्डयेमले २ तथा निजाकत खानले १ विकेट लिए । यसअघि बंगलादेशको कक्स बजारस्थित सेख कमल अन्तराष्ट्रिय क्रिकेट स्टेडियममा टस हारेर पहिले ब्याटिङ गरेको हङकङले निर्धारित ओभरमा २ सय १४ रन जोडेको थियो । नेपालका अविनाश कर्णले ३, ज्ञानेन्द्र मल्ल, भुवन कार्की र सुसन भारीले २र२ र सन्दिप लामिछानेले एक विकेट लिए । समुह बीमा रहेको नेपालले आजको जीतसँगै २ अंक जोड्दा हङकङ अंकबिहीन रहँदै तालिकाको पुछारमा पुगेको छ ।