काठमाडौं– आईसीसी यू–१९ विश्वकप छनोट प्रतियोगितामा नेपालले मलेसियालाई पाँच विकेटले पराजित गरेको छ । टस जितेर ब्याटिङ रोजेको मलेसियाले ३५ दशमलव १ ओभरमा सबै विकेट गुमाएर ८९ रन बनाएको थियो । मलेसियाका प्रारम्भीक ब्याट्समेन सेइद अजिजले ४६ रन बनाए भने अन्य खेलाडीले राम्रो प्रदर्शन गर्न सकेनन् । नेपालका लागि सन्दीप लामिछानेले ७, सहाव आलमले २ र रिजन ढकालले एक विकेट लिए ।
प्रतिउत्तरमा नेपालले जित हासिल गर्न पाँच विकेट गुमाउनु पर्‍यो । २२ दशमलव २ ओभरमा पाँच विकेट गुमाएर ९२ रन बनायो । नेपालका लागि रोहित कुमार पौडेलले ३४, दीपेन्द्रसिंह ऐरीले १९, सन्दीप सुनारले १५ र अनिल शाहले १२ रन बनाए । मलेसियाका लागि वीरनदीप सिंहले ३ र हफिजिद्दिनले २ विकेट लिए ।
प्रतियोगिताका सबै खेल जितेको अफगानिस्तान शिर्षस्थानमा छ भने नेपाल एक खेल हारेर दोस्रो स्थानमा छ । नेपालले अर्को खेल भोलि मंगलबार अफगानिस्तानसँग खेल्ने छ ।